31 January 2022
19:28 - Юсуф Жума: Қозоқистон фоъжеаси - Марказий Осиё фожеаси!
Барча билган, барча айтган ва айтаётган ҳақиқатларни такрорлаш - нодонлик.
Ҳамма билган, вале ҳамма айтишдан қўрққан ҳақиқатни айтиш - ботирлик - қаҳрамонлик.

Ҳеч ким билмаган ҳақиқатларни илғай олиш - англаб етиш ва ўзгаларга тушунтириш - етказиш - донолик.

Инсониятнинг кўпчилиги нодонлик поғонасида гаплашади. Ўзбеклар қарийиб ёппасига - келгиндилар - тозилару ўзга ёвлардан юқишган - ғийбатга - нодонликка ўч.

Айниқса - қаламкашлари, зиёлилари... айтгану битганлари - ВАЙСАҚИЛИК.
Бир - иккисидан ташқари...

Агар бу вайсақилик элу юртга фожеа бўлмаётган бўлсайди - бу вайсақилар тўғрисида ёзмаган бўлардим.

А.Навалнийнинг қизи - Даръя - студент Европарламентда сўз айтиб - жасоратли бир сўзда жасоратсиз дунёни синдирди. Бизнинг “улуғлар” кейинги ўттиз йилда шундай сўз айта олдими, бита олдими?!...
Фақат ғиди - ғиди...

Озодлик радиоси журналисти - битта юртдаги “улуғ”дан, битта четдаги “улуғ”дан сўраяпти -
Ўрисдан айри бўлсак - мардикорлар хафа бўлмайдими - ахир улар патент тўлаяптику? –деган маънода.

Жавоб - баландпарвоз вайсақилик - юрт мустақиллиги патентдан муҳимлиги ҳақида.
Эй нодон, қанақа мустақиллик ҳақида ҳураяпсан?!
Юрт мустақил бўлса - эл қулу чўри бўлармиди?!
Юртнинг ер ости бойликларини сотқинлар ўрисга текинга
бермаса, юрт ўрисга қарам бўлмаса, Хитойга таланмаса, дунёга
таланмаса, Марказий Осиё битта - ягона давлат бўлса -
дунёнинг энг қудратли, энг бой мамлакатига - буюк Туркистонга айланмасмиди?!.. Қозоқистон фожеалари тўғрисида ҳам шундай узундан – узун вайсақилик...

“Озодлик” радиоси шундай икки-уч вайсақини топиб олган вайсайверади - вайсатаверади...
Адашган элни адаштираверади...

Сотқин Қосим-Номард Тўқаевдан бошлаб барча Нурсултон Назарбоевнинг юртни талагани тўғрисида вайсаяпти.

М.О.да биронта кон борми - ўрис эгалик қилмаётган бўлсин?!
Ёв бизнинг Туркистонни талаб - империя қураяпти - бункердаги улътиматумчи ўнлаб халқлар устидан ҳукм ўқияпти - вайсақилар шу ёвузга ишлаяпти, Назарбоевнинг уйларини Қозоқистон фожеаси - М.О. фожеасини боиси деб элларни адаштирятилар.

Бу фожиа - Кремл фитнаси.
Бункердаги улътиматумчи йиллик матбуот йиғинида Назарбоевни мақтади.
Россияга олиб борди - гўё алоқалар зўрдай.
Дунёни Украина билан чалғитди.
Бир ўқ билан икки қуёни овламоқчи бўлди.
Бирини М.О. овлади.

Бор ҳақиқат шу - шуни биров айтса, шу битаётганимни битмасдим...
Бу фитна билан - Шундоқ ҳам Кремл олдида эри ўйнаши билан ушлаган ғардек ўтирувчи “президент”чаларнинг кўзини хонасидан чиқариб, М.О. мангу меники деб дунёга - ўчмаган қизил чизиқни қозоқлар қони билан бўяб қўйди.Баҳорда СССРни тиклайди...

Юрагида Туркистон орзуси бор, Чимкентни Туркистон деб отлаган, Н.Назарбоевни ўз эли қўли билан йўқ қилди.

Йўқса Тоқаевдай ноэр, сотқин Назарбоевга қарши бора олармиди?!... Қозоқ қондошларимизнинг қонини ичди - сўзсиз бу қонни қусади... Каримов Андижон қирғини учун боши билан жавоб бермадими... Билганлар билади..
Ҳали руҳи ҳам чирқирайди...

Энди Назарбовчилардан олинган Қозоқгаздай ширкатлар бойлиги қозоқ элига оқадими - бари ўрисга кетади.
Учаткавойликдан президенликкача эгаллаган хоин Тўқаев
яна миллионта курсини эгалласа ҳам сотқинлигини кучайтиради...
Эл унга қарши экан, армия, хавфсизлик идоралари унга қарши экан - Кремль тайинлаган бу иркит тозаю -бутун миллат террорчи бўлдими?!...

М.О.нинг фожеаси - СОТҚИНЛИК ва МУСТАМЛАКАЧИЛИК.
Беш мамлакат ҳам қўштирноқ ичидаги “давлатлар”.

Буни ўттиз йил давомида тўтиқушдай такрорлаб, барини бирлашишга чорлаб келдим.

Н.Назарбоевга 2011 йилда -“Жаслиқ”дан чиққан пайтимда битик битганман.
Улуғ бобомиз Култегин битикларини эслатганман.
Албатта - Назарбоев уринди ва шу боис ҳам иззатга лойиқдир.
Лекин бу ишни Ўзбекистонсиз этиш қийин эди.
Лаънати Каримов қаршилик этди...
Нима бўлганда ҳам ҳатто Қозоқистоннинг бир ўзи бўлса ҳам чинакам давлат қуриши керак эди.

Нурсултон Назарбоевга жасорат етмади...
Кейинроқ яна Назарбоевга ёздим - Георгий лентасини кўксинггизга осиб юргунча - давлат қуринг дедим.

Ғалабанинг пойдевори - жасоратдир....
Мана энди бугун тириклай ўлиб, гўрга кираман деса - Туркистон тупроғидан уялиб ўтирибди...
Бундан Жаноб Мирзиёев сабоқ олиши шарт.
Қанча юкинмасин - ёвни рози этолмайди, аллақачон унинг ортида айғоқчилар изғимоқда.
Бош Вазирни бўшатаман деб бўшата олмади - Кремл рухсат бермади. 18 ҳужжатга қўл қўйди - биттаси ҳам ошкор этилмади -
ҳаммаси ўриснинг фойдасига... агар ўзбекнинг фойдасига
бир дона картошка бўлганда ҳам кўз - кўз этиларди...

Рашидов нима бўлди, Каримовчи, Назарбоевчи...
Кўз борми?!...
Ҳамиша ёзиб келаётганимдай - Ё Хитой билан ўрисдан йироқ бўлиб, М.О. ягона давлат бўлади, ё М.О.да биронта ҳам давлат бўлмайди...

Бу Ўзбекистонга боғлиқ...
Ёлғонларни бас этинг!
Элга газ бердим деб ўтирибсиз - ўзбек ёппасига газсиз -
қишлоқлар газдан узилган - сиз уздинггиз - ўрисга газни кўпайтиряпсиз... Кечаги ток фожеси ҳам газнинг ГЭСларга етарли етиб бормаганидан. Ёлғон билан ким давлат қурган?!
Сотқинлик билан ким давлат қурган?!
Очкўзлик билан ким давлат қурган?!...
Қозоқистон М.О.нинг энг фаровон юртику!
Ўзбекистондан минг карра яхши яшайди.

Лекин қозоқлар бундан ҳам фаровон яшашга ҳақли, бу учун ўрис ва Хитойга қарам бўлмаслиги, чинакам давлат бўлши шарт? Ўзбекнинг куни кунми - дунёга қул, чўри хор...

Оилавий давлат қуриб олгансиз...
Яқинларинггиз Сизга дўстми?!
Тўғрисини айтадими?!
Ўзинггиз ўзинггизга дўстми?!
Оёққа зўр берганча... каллага зўр беринг...
Мени душман санайсиз, мен ҳурмат қиладиган Шароф Убайдуллаевнинг қозоқ фожеаси ҳақидаги”Озодлик”даги сўзларни диққат билан тингланг - сабоқ олинг...
Сизга битта дўст бўлса - шу одам дўст.

Тенгсиз соҳибқирон улуғлар улуғи Амир Темур ҳазратларининг- муборак руҳларига Улуғ Тангрининг олқиши ёғилсин - хазиналарига ўғиллари Шоҳруҳ Мирзо кирадилар.
Сандиқлар очилади... ҳеч нарса нарса йўқ...
Ерда - тупроқда ётган бир сариқ тангани топиб оладилар...

Кўзларига ёш олиб, чақани кўзларига суртиб - бизга шу ҳам етарли деб хазинадан чиқиб кетадилар...
Элни бойитинг, давлат қуринг, Хитойу Ўрисга юкинишни бас этинг - Валихон Калоновни озод этинг, юртнинг эрларини асранг, йўқса юртнинг ҳам, Сизнинг ҳам ўлиминггиз шулардан келади...

Қарамликда тахтга чиқиш бор... ўз ажалидан ўлиш йўқ...
Ўз ажалинггиз билан ўлишинггиз учун - элни ажалидан бурун ўлдирмаслигинггиз шарт... элни қўрқитманг, ботир этинг - эл сизни сақлайди...
ТАНГРИНИНГ КУЧИНИ СИНАМА!!! - деб ўгит берган Ҳазрати ИСО...

Афғондан АҚШ қочди, дунё Си билан Путингга қолди деб ўйламанг... Ким қочяптию, ким қувяпти... Тангри билади...

Отда пайтинггиз кўзни очинг, отни қамчиланг, эртага на от, на қамчи бўлмаслиги мумкин,
Жаноб Шавкат Миромонович,
Эпласа бўлади, йўллари бор, фақат юрак, ақл, кўз керак...

2022 йил, 29 январь.
« Олдинги хабар Хабарлар рўйхати Кейинги хабар »