30 May 2021
13:14 - Юсуф Жума: Ҳаммага насиҳатларим!
Алексей Навальнийга!

Тўртдан бири ўрис элининг
Оқ - қорани танийдиган эл.
Ўлимини бўйнига олиб,
Эрк йўлини танлайдиган эл.

Кўзи очиқ бундоқ халқ учун
Зиндонларда ётсанг арзийди.
Эсиз мен ҳам бўлганман тутқун ,
Шундоқ элим бўлса қанийди?!

Нетай - қавмим ётдир номусга,
Нетай - ёвнинг шотири бўлса?!
Тўртдан бири эмас, улусда
Тўртта оқил ботири бўлса…

2021 йил, 28 май.

* * * * *

Буюк тилаклар борки - ёлғиз етиб бўлмайди,
Зўр бўлсанг ҳам бир очун ёвни отиб бўлмайди.
Энг улуғ эр этувчи ишни этишинг мумкин,
Энг улуғ эл этувчи ишни этиб бўлмайди.

2021йил, 29 май.

* * * * *

Кетдик ошга - десанг, барча йўлдошинг.
Кетдик ишга - десанг, барча йўлдошинг.

Кетдик эркка! - десанг, бир эр чиқарми -
Бутун элдан бир мард жонни тикарми?!

Кетдик қуликка! - де, ҳамма эргашар.
Ёвга қуллуққа! - де, ҳамма эргашар.

Кетдик майдонга! - де, чиқарми бир эш?!
Кетдик имонга! - де, ким кўтарар бош?!

Иркит шоҳни ялаш бизга - дегин - дин!
Ҳамманинг сўлаги оқиши тайин.

Кетдик ор - шонга! - де, бир эр чиқарми?!
Кетдик Туронга! - де, бир эр чиқарми?!

Тангри бундоқ элга берарми омон ,
Берарми озодлик?! беради қирон…

2021 йил, 29 май.

* * * * *

Дедилар - бир кентда бир эр бор ,
Дардлашай деб юртдан, от солдим.
Деди: кут, ош тотмоғим даркор…
Гаплашмасдан гаплашиб бўлдим.

Дедилар - бир улуғ бор - доно,
Елни доғда қолдириб елдим.
Деди: - қонман, йўқламас подшо,
Гаплашмасдан гаплашиб бўлдим.

Кимга бир сўз айтибман - эсиз -
Пушаймондан минг карра ўлдим.
Одамзотдан қочаман - сўзсиз -
Гаплашмасдан гаплашиб бўлдим…

2021 йил , 29 май.

* * * * *

Ё раббий, қачонгача қараб турасан?!
Ҳаётимни шу йиртқичлардан халос қил!
Ҳазрати Довуд.

Ҳиммат этма - ҳимматсизларга,
Ҳиммат этиб - мен нима бўлдим?!
Шавқат этма - шавқатсизларга,
Шавқат этиб - мен нима бўлдим?!

Гар қумусқа чақиши аён -
Ўлдир уни! Бермагин омон,
Аждар бўлди бағримда илон,
Тоқат этиб - мен нима бўлдим?!

Меҳр сочдим барчага бирдай ,
Ҳар биттаси йўлимда жардай,
Ютаман дер ёрилган ердай,
Иззат этиб - мен нима бўлдим?!

Инсоният - оч йиртқич тўпор,
Ёвузини қирса БируБор,
Бир яхшиси қолса - тикла дор,
Шавқат этиб - мен нима бўлдим?!!!

Ҳар жон боши, осмон - аждаҳо,
Томошабин Тангри ҳам ҳатто -
Кўп юкиндим - этмади парво,
Тоат этиб - мен нима бўлдим?!

2021 йил , 29 май.

* * * * *

Ёшлигим ўтдими - кучим синдими,
Бетимга боқмагин, отимга боққин -
Ўт учқуни эмас, Тангри учқуни !!!
Бетимга боқмагин, отимга боққин!

Кўкларни ҳуркитар - тулпорим дами,
Чақнаган чақинлар - дамининг шами,
Ўзига интилар ёғдунинг жами,
Бетимга боқмагин, отимга боққин!

Суйганинг ёш бўлса демак сен ёшсан,
Севганим - эрку ҳақ - ёшдан ҳам ёшман,
Севгидан бош - оёқ ўтман, оташман,
Бетимга боқмагин, отимга боққин !

Олов кучайганда - кучаяр тутун,
Тутуним тўлқини - юзим - серажин,
Дуссага боқмагин, ўтга боқ - ойдин ,
Бетимга боқмагин, отимга боққин!

Озодлик - ҳақиқат - Ўзининг мулки -
Ўзидир - Ўзининг муборак кўрки!
Қартаярми Тангри - Тангридан кўчки ?!!!
Бетимга боқмагин, отимга боққин!!!

2021 йил, 29 май.
« Олдинги хабар Хабарлар рўйхати Кейинги хабар »