Кеча 25 март куни АҚШ Президенти Доналд Трамп Исроилнинг Сурия билан чегарасидаги баҳсли ҳудуд деб ҳисобланадиган Голан Тепаликлари Исроилники эканлигини тан олиш ҳақидаги ҳужжатни имзолади. Ҳужжат имзоланиш пайтида Исроил Бош вазири Бинямин Нетаняху ҳам шу ерда эди ва у 25 март тарихий кун сифатида тарихда қолишини алоҳида урғулади.

Доналд Трамп ҳужжатни имзолаш маросимида шундай дебди: “Исроил ўзини хавфлардан ҳимоялаш учун 1967 йилда Голан Тепаликлари устидан назоратни қўлга олганди. Бугун бу тепаликлар Эрон ва Суриядаги террорчилик гуруҳлари, жумладан “Ҳизбуллоҳ”дан ҳимояланиш учун керакдир.”

Эслатиш керакки, Исроил бу тепаликларни 1967 йилдаги Олти Кунлик Уруш вақтида эгаллаб олган, аммо ҳеч ким буни тан олмаган эди. Трампнинг фикрича, Голан Тепаликлари аллақачон Исроилга берилиши керак эди.

Унутмайликки, 2017 йил охирида Трамп Қуддусни Исроил пойтахти деб тан олган, 2018 йилда эса, АҚШнинг элчихонаси шу шаҳарга кўчирилган эди. Ҳозир яна бир нечта давлат ўз элчихонасини Қуддус/Иерусалимга кўчиришга тайёрланмоқда.

Нима ҳам дердик, АҚШ нима деса, айнан шундай бўларкан-да.