Ўтган кунги хабаримизда Демократик Кучларнинг Миллий Кенгаши номи остида бирлашган Озорбайжон демократлари “Меҳмон Гусейнов ва бошқа сиёсий маҳкумларга озодлик!” шиори остида Боку шаҳридаги “Мехсул” стадионида 20 минг кишилик митинг ўтказганларини билдирган эдик.

Ўша митингда нутқ сўзлаган Халқ Ҳаракати Партиясининг лидери Али Каримли демократияни ривожлантириш, сиёсий маҳкумларга озодлик бериш талабларини айтиш билан бирга, ҳаммани эртаси кун шаҳар марказидаги Шаҳидлар Хиёбонига келиб, Озорбайжон озодлиги учун шаҳид бўлганларни хотирлашга чақирган экан. Кеча, 20 январда минглаб демократлар Шаҳидлар Хиёбонига оқиб келабошлаганларида, милиция уларни Хиёбонга яқинлаштирмаслик учун ҳаракат қилди, дейилади мухолифатчиларнинг Турон каби ахборот воситаларида тарқатган хабарларида.

Уларни ушлаб туришга кучи етмаслигини тушунган милиция демократларни 15 кишилик гуруҳлар ҳолида Шаҳидлар Хиёбонига киришга рухсат берибди.

- Бизнинг мақсадимиз Шаҳидлар Хиёбонида митинг ўтказиш эмас, шаҳидларимизни хотирлаш эди. Бизни тўхтатиб қолишга кучи етмаслигини тушунган президент Илҳом Алиев, бизни 15 кишилик гуруҳлар шаклида Шаҳидлар Хиёбонига киришга рухсат берганга ўхшайди. Шундай қилинди. Ҳокимият демократик мухолиат йўқ бўлганини гапирарди, мана ундай эмаслигини кўрсатдик. Ҳокимият халққа ҳурматсизлик кўрсатди. Бу айнан ҳокимият учун уятдир. Бугунги воқеа бумеранг бўлиб ҳокимиятнинг ўзини уради, - дебди бу ҳақда Халқ Ҳаракати Партиясининг лидери Али Каримли.

Хабарларда айтилишича, анчагина мухолифатчилар милиция тарафидан ушлаб кетилган, аммо кейинчалик уларнинг мутлақо кўпчлиги қўйиб юборилган.

Расмда Шаҳидлар Хиёбонига келаётган мухолифатчилар оқимини кўрмоқдасиз. Пальтодаги галстукли киши Али Каримлидир.

Шу йил 19 март – Миллий Уйғониш Кунининг 30 йиллигини нишонлаш учун ўзбекистонликлар Тошкентдаги Мустақиллик Майдонига шу расмдагидек келишлари керак. Майдонга келиш соатини кейинчалик билдирамиз.