СССР замонида Социалистик Меҳнат Қаҳрамони унвони ҳам олган Аҳмаджон Одил бугун 92 ёшида Наманган вилоятининг Поп туманидаги уйида вафот этди. Бу ҳақда хабар қилган “Бирлик”чи Араббой Қодирга кўра, у бугуннинг ўзида Ғурумсаройда дафн этилди. Совет замонининг энг довруқли ўзбекларидан бири бўлган бу одамнинг жанозасига ниҳоятда кўп одам йиғилган.

Умрининг 24 йилини қамоқларда ўтказган бу одам аввалига “пахта иши” доирасида Совет замонида озодликдан маҳрум этилган эди. У замонда бутун СССР коррупция ва порахўрлик ботқоғида ётганини ҳисобга олсак, унинг ўша пайтдаги қамалиши учун етарлича асос бўлган. Аммо, Ўзбекистон ҳақиқий мустақилликка эришгандан кейин, “Темур адолати” партияси тузиш айблови билан уни зиндонга ташлатган ҳаромий Ислом Каримни оқлаб бўлмайди.

Аҳмаджон Одил 2008 йилнинг 5 июнь куни АҚШ Давлат Котибининг Жанубий ва Марказий Осиё бўйича ёрдамчиси Ричард Баучернинг сўрови билан озод қилинган.

У кишини Аллоҳ раҳматига олсин, гуноҳларини мағфират қилсин!

Ўтган асрнинг 70-80-чи йилларидан бирида олинган расмда – Ўзбекистон Компартиясининг биринчи котиби Шариф Рашид ва Аҳмаджон Одил.