02 February 2017
01:14 - АҚШ Сенати Рекс Тиллерсонни Давлат Котиби лавозимига тайинланишини тасдиқлади
Янги Президент Доналд Трамп машҳар Exxon Mobil нефть ширкатининг собиқ раҳбари Рекс Тиллерсонни ўз ҳукуматида Давлат Котиби лавозимига танлаганини ўтган йилнинг декабрь ойидаёқ эълон қилган эди. Бугун АҚШнинг Сенати унинг номзодини тасдиқлади. 100 кишилик Сенатнинг 53 аъзоси Рекс Тиллерсонни қўллаб-қувватлабди, 42 аъзоси қарши овоз берибди. Унга овоз берганларнинг мутлақо кўпчилиги республикачилар, қарши бўлганларнинг мутлақо кўпчилиги демократлар экан. Шундай қилиб, Рекс Тиллерсон расман Давлат Котиби бўлди.

Бу ҳақда хабар берган Reuters Агентлиги Рекс Тиллерсонни русларга яқин одам деб тилга олади, аммо яқинликни қайси маънода тушуниш кераклигини очиқча гапирмайди. Буҳақда бошқа оммавий ахборот воситалари ҳам бир ойчадан бери сариқ матбуотчилик руҳида хабарлар тарқатиш билан оворалар.

Аммо, Рекс Тиллерсон АҚШнинг сиёсий саҳнасида мутлақо янги одам. У ташқи сиёсатга нима янгиликлар киритиши мутлақо номаълум. Табиий, у Доналд Трамп истаган сиёсатни олиб боради. Ҳамма гап шундаки, янги Президентнинг сайловолди кампанияси давридаги Россия Президенти Владимип Путин ҳақида айтган илиқ сўзлари қанчалик самимий эканлиги номаълум.

Воқеалар қандай ривожланишини кузатиб боришдан бошқа йўл йўқ. Трамнинг Путинга ҳақиқий муносабати - АҚШнинг собиқ Совет республикларига нисбатан олб борадиган сиёсатига таъсир қилиши эса шубҳасиздир.
« Олдинги хабар Хабарлар рўйхати Кейинги хабар »