Бир соатдан кейин АҚШ парламенти - Капитолий биноси олдида Доналд Трампнинг президентлик лавозимини расман эгаллаш маросими – инаугурацияси бошланади.

Аммо ҳозиргина Доналд Трамп ўз турмуш ўртоғи билан Оқ Уйга келди. Уларни Оқ Уй олдида Барак Обама турмуш ўртоғи билан кутиб олди. Улар ҳаммалари қучоқлашиб кўришишди ва ичкарига кириб кетишди.

Кўринишидан, собиққа айланаётган президент инаугурациядан аввал янги президентга ҳама калитларни топширади. Кейин улар биргаликда тахминан 1 км наридаги Капитолийга борадилар.

Телеканаллар Капитолийга келаётганларни ҳам жонли эфирда кўрсатиб турибдилар. Ҳозиргина у ерга собиқ президен Жорж Буш турмуш ўртоғи билан келди. Ҳамма пальто ёки плашда, осмон бироз булутли ва Қуёш кўринмаса ҳам, ёмғир йўқ ва бўлмайдиган кўринади, демак, муҳташам инаугурация маросими бўлади.

Вашингтон майдони атрофида қандайдир Доналд Трампга қарши гуруҳлар инаугурацияга келаётганларнинг йўлини тўсишга ҳаракат қилаётганлари ҳақида баъзи хабар агентликлари ёзмоқдалар. Аммо, кўринишидан, “Ҳаракат” аввалдан башорат қилгандек, норозилар ҳеч қандай пичоққа илинадиган жанжал-тўпалон чиқаролмайдилар.