Ўзбекистон Республикаси Олий Мажлиси Сенатининг саккизинчи ялпи мажлисини шу йилнинг 13 декабрь куни Тошкент шаҳрида чақирилиши ҳақида маҳаллий матбуот хабар қилди. Ялпи мажлис муҳокамасига аҳоли турмуш даражасини янада оширишни ва унинг ижтимоий ҳимоясини кучайтиришни, иқтисодиёт ўсишининг юқори ва барқарор суръатларини таъминлашни, аҳолини иш билан таъминлашни назарда тутувчи Ўзбекистон Республикасининг 2017 йилги Давлат бюджети, давлат мақсадли жамғармаларининг бюджетлари ҳамда солиқ ва бюджет сиёсатининг асосий йўналишлари тўғрисидаги, шунингдек 2017 йилда аҳоли бандлигини таъминлаш дастури тўғрисидаги масалаларни киритиш режалаштирилган.

Сенат ялпи мажлисининг кун тартибига мамлакат сиёсий ва ижтимоий-иқтисодий ҳаётининг барча соҳаларини босқичма-босқич ислоҳ қилишга ҳамда эркинлаштиришга қаратилган Ўзбекистон Республикасининг бир қатор қонунлари киритилмоқда, деб ёзмоқда маҳаллий веб нашрлар. Айнан “Коррупцияга қарши курашиш тўғрисида”ги, “Солиқ ва бюджет сиёсатининг 2017 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунлар ва бошқа қонунлар шулар жумласидандир.

Буни қарангки, эртага коррупцияга қарши қонунни маъқуллайдиган масхарабозларимиз айнан коррупцияда айбланган ва жавобгарликка тортилган Абдулла Ариповни мамлакат ҳукумати раҳбари этиб сайлашмоқчи, дейди мухбиримиз.

Аммо, шуни ҳам унутмайликки, коррупцияга қарши курашнинг энг самарали йўли – демократияни ривожлантиришдир. Шундай экан, Сенат эртага қабул қиладиган қарорларда демократияни қоғозда эмас, амалда ривожлантириш кафолатланмаса, коррупцияга қарши кураш ҳақидаги гаплар қоғозда қолиб кетаверади.