12 December 2016
01:29 - Бечора АҚШ ва Россия: Суриядаги дунёга машҳур Палмира яна ИШИД қўлига ўтди. Нима қилиш керак?
Авваламбор шуни урғулаш керакки, дунёнинг энг кучли 2 мамлакати – АҚШ ва Россия – ҳалигача қандайдир ИШИДни йўқ қилолмаяптилар. Шу сабабли, АҚШ ва Россияни бечоралар десак бўлаверади.

2015 йилнинг 21 май куни тарқатилган хабарларимизда Суриядаги ЮНЕСКО тарафидан Жаҳон мероси ёдгорликлари деб эълон қилинган иншоатларга тўла Палмира шаҳрини ИШИД жиҳодчилари босиб олганини, шу билан Сурия ҳудудларининг ярми ИШИД назорати остига ўтганини билдирган эдик. Айнан ўша пайтда ИШИДчилар Палмира шаҳридаги қадимий ёдгорликларни ўрганиш билан шуғулланадиган ва бу ёдгорликларнинг рамзий сақловчиси ҳисобланадиган 82 ёшли археолог Ҳалед Асаднинг калласини кесиб, танасини Палмира марказидаги қадимий колоннага осиб қўйгандилар. Кейин Палмирадаги инсониятнинг тарихий ёдгорликларини бузиб ташлаш бошланганди.

Тўғри, бир неча кун аввал Сурия қўшинлари Россиянинг ёрдамида Палмирани ИШИДдан озод қилган эдилар. Аммо, кеча ИШИД қарши ҳужумга ўтиб, Палмирани қайтадан қўлга олди.

Хўш, АҚШ ва Россия қаерда? Бу икки давлатнинг ҳар бирининг мақсади - Яқин Шарқни ўз назорати остига олиш. Бундан ИШИД усталик билан фойдаланаётганини тан олиш керак.

Ҳеч шубҳа йўқки, нафақат ИШИД, балки, унга ўхшаган террористик ташкилотларнинг келажаги йўқ. Аммо, АҚШ ва Россия ислом терроризмига қарши ҳарбий куч сифатида бирлашсалар ҳам, ислом терроризмини йўқ қилолмайдилар. Чунки, ислом терроризмининг илдизлари - Қуръонни хато тафсиридан келиб чиқувчи ва Ислом дини тарафидан тан олинган хато тушунчаларидадир. Шундай экан, ислом терроризмини йўқ қилишнинг ягона йўли Ислом динини йўқ қилиш бўлиб кўринмоқда. Бу хато тушунча ва хато тушунчалардан қутилиш керак.

Бу боши берк кўчадан чиқишниннг ягона йўли - Ислом динида фундаметлар ислоҳотлар ўтказиш ва Ислом дини дунёвийли/секуляризм принципини қабул қилишига эришишдир. Бу ғояни “Бирлик” Партияси лидери Абдураҳим Пўлат ва “Бирлик”нинг жарчиси бўлган “Ҳаракат” кўп йилллардан бери айтиб келмоқда. Қизиқ, АҚШ ва Россия буни қачон тушунишади?
« Олдинги хабар Хабарлар рўйхати Кейинги хабар »