04 October 2016
06:09 - Туркча масхарабозлик: Фатхулла-гуленчи деб топилган 12 мингдан кўп полиция ходими вазифасидан четлатилди. Буёғи нима бўлади? “Ҳаракат” айтаётгандек бўлади!
Турклар ишдан расман ҳайдалмаса ҳам, хизмат вазифасидан узоқлаштирилганларни “очиққа олинганлар” дейишади. Кеча Туркия ички ишлар вазирининг қарори билан 12 минг 700 полиция ходими фатхулла-гуленчиларга оид эканлиги тахмин қилинаётгани сабабли очиққа олинган.

Аввалги хабарларимиздан маълумки, 15 июль куни кечаси давлат тўнтаришига уриниш бўлганидан кейин, Туркияда Фавқулодда Ҳолат эълон қилиниб, Туркия армиясининг тахминан 150 генерал-адмирали фатхулла-гуленчиликда айбланиб армиядан ҳайдалиб, бир қисми ҳибсга ҳам олинганди. Айнан ўшанда биз шундай таҳлил ёзган эдик: “Бу – Туркия армиясидаги ҳамма генерал-адмиралларнинг учдан бири экан. Ақли бор одам ўйлаб кўрсин, агар Туркиядек катта бир давлат армияси таркибидаги 150 генерал-адмирал тинч бир пайтда ўз ҳукуматидан воз кечиб Фатхуллачилар Террор Ташкилоти деб айтилаётган гуруҳга ўтган бўлса, бу дегани Туркия армияси - армия эмас, масхарабозлар отряди бўлиб қолмайдими. 15 йилдан бери ҳокимият бошида бўлган Ражаб Эрдўғон шуни билмаган бўлса, у давлат раҳбари эмас, бош масхарабоз-ку”.

Ўша пайтдан бери 81 минг (!!!) одам давлат тизимларидаги ишидан ҳайдалди, уларнинг баъзилари вақтинча ишдан четлатилган дейилмоқда, 16 минг одам ҳибсга олинди. 7 университет ва юзлаб хусусий мактаблар бекитилди. Ўн минглаб ўқитувчилар ишдан четлатилди ва ҳоказолар.

Кеча сал кам 13 минг полиция ходимининг очиққа олиниши кўрсатмоқдаки, ўша туркча масхарабозлик ҳали ҳам давом этмоқда.

Шу кунларда Туркиядаги онамухолифат ташкилоти бўлган Жумҳурият Халқ Партиясининг лидери Кемал Қиличдорўғли катта бир йиғилишда 2004 йил 25 август куни ўша пайтдаги Туркия Президенти Аҳмет Неждат раҳбарлигида ўтказилган Миллий Хавфсизлик Кенгаши мажлисининг қарори нусҳасини ҳаммага кўрсатди. Қарор Президентдан ташқари, ўша пайтдаги Бош вазир Ражаб Эрдўғон, Қуролли Кучлар Бош штабининг бошлиғи ва Миллий Хавфсизлик Кенгашининг аъзоси бўлган бир қатор вазирлар тарафидан имзоланган. Ўша қарорда фатхулла-гуленчилар таҳдиди тилга олиниб, бунинг олдини олиш учун ҳамма тегишли идораларга кўрсатма берилган экан.

Мана орадан 12 йил ўтиб, фатхулла-гуленчилар ҳамма ерни эгаллашибди-да, Ражаб Эрдўғоннинг Адолат ва Тараққиёт Партияси ҳокимиятда бўлган Туркияда буни ҳеч ким билмай қолибдими?

Булар кўрсатмоқдаки, “Ҳаракат”нинг ўша давлат тўнтаришига уриниш кунлариёқ айтган фикрлари мутлақо тўғри экан. Фикрлар эса шундай эди. Ражаб-эрдўғончилар ва фатхулла-гуленчилар ҳар доим бирга бўлишган ва уларнинг асосий мақсади Туркияни исломий давлатга айлантириш бўлган. Аммо, ҳозир бу икки гуруҳ орасида тахт учун кураш бошланди. Уларнинг қайси бири ғалаба қозониши – биз дунёвийлик/секуляризм тарафдорлари учун муҳим эмас. Муҳим бўлгани, дунёвийлик/секуляризм тарафдорлари бу воқеадан фойдаланиб, ислом фанатикларининг попугини пасайтириб қўйишлари керагидир. Аммо, ҳозир Туркияда шундай қилишга кучи етадиганлар борми? Бу саволга ҳозирча жавоб йўқ.

Агар бу курашда исломчилар ғолиб чиқса, Туркия Эрон каби исломий давлатга айланади, Халифаликни тиклаш учун беҳуда кураш бошланади. Тушуниш керакки, энди ҳеч ким Халифаликни тиклай олмайди, аммо Турк Дунёси тушунчаси маълум пайтга ўлади.

Тўғри, Ражаб Эрдўғоннинг ҳам бош қотган. Агар у Туркияни исломий давлат қилиш ва кейин Халифалик яратиш мақсадини очиқласа, фатхулла-гуленчиларнинг мутлақо кўпчилиги унинг тарафига ўтиб кетишади. Аммо, Турк давлатлари, бир қатор ислом мамлакатлари ва бундан ҳам муҳими, Ғарб, Россия, Хитой ва бошқалар Туркияга босим қилишади. Бу босимга қарши туролмаслигини Эрдўғон жуда яхши билади, у ўзича вақт кутмоқда. Фатхулла-гуленчилар эса, вақт келди деб ўйлашаётганга ўхшайди.

Эй, калтафахмлар! Энди сизлар кутаётган вақт келмайди. Исломда фундаментал ислоҳотлар албатта ўтказилади, Ислом дини дунёвийлик/секуляризм принципини қабул қилади.
« Олдинги хабар Хабарлар рўйхати Кейинги хабар »