03 October 2016
23:21 - САМАРҚАНДДА ПОРАХЎР РАҲБАР ТЎРГА ИЛИНМАЯПТИ (“Эзгулик” жамиятининг пресс-релизи - № 18, 03.10.2016)
2015 йилнинг 13 июнь куни Самарқанд вилояти Пастдарғом тумани Усмонобод маиший хизмат кўрсатиш касб-ҳунар коллежи директори Муқаддас Тиллаева ва унинг хамтовоғи ўқитувчи М.Хазратқуловлар сохта диплом сотиш эвазига фуқароларнинг биридан 550 000 сўм пора олаётганида туман МХХ бўлинмаси тезкор вакиллари томонидан ҳибсга олинди. Шунингдек, бу жиноят юзасидан коллежда ўтказилган молиявий тафтиш жараёнларида 27,8 миллион сўм миқдорида талон-тарожлик ҳам аниқланди. Бу уддабурон М.Тиллаеванинг саъйи-ҳаракатлари билан камайтириб кўрсатилгани.

Самарқанд вилояти Пасдарғом тумани Ошиқ ота маҳалласида истиқомат қилиб, шу коллежда фаолият олиб борувчи педагог Тойир Умаровга кўра, бундан пастдарғомликлар хурсанд бўлишди. Иш судга оширилди, суд ими-жимида ўтиб ким қандай жазолангани хануз сир бўлиб қолмоқда. Зеро иккала порахўр ҳеч нима бўлмагандек ўз вазифаларида от ўйнатиб ундандан кучайиб кетишган. Директор хоним бошига тергов, суд ишларини солган 21 нафар педагогни бирин-кетин жазолаш билан хуморидан чиқмокда. Меҳнат таътилини талаб қилган 13 нафар ўқитувчилар шулар жумласидандир. Таълим тизимида ўзига хос диплом сотиш бизнесини йўлга қўйган ва мунтазам ўқувчи ва ота-оналардан пора олиб келган хонимнинг фаолиятига чек қўйиб бўлмади.

“Аммо биз ҳуқуқий демократик, қонун устивор жамиятда яшаяпмиз, деб хомтама бўлиб юрган эканмиз. МХХ тоомнидан жиноят устида қўлга олинган раҳбар яна лавозимига қайтиб келди ва энди аввалгидан ҳам каттароқ иштаҳа билан қонунбузарликларга киришиб кетди. Авваллари ўқувчи ва уларнинг ота-оналаридан чўтал олиб келган Тиллаева энди ҳамкасб педагогларнинг ҳам ҳақига кўз олайтирмоқда. Ойлик маошларни шундоқ ўзлаштираётган директорнинг хулқига, унинг оғзидан чиқаётган ҳақорат-у дашномларга чидаб бўлмайди” дейди Тойир Умаров.

Албатта юқоридаги таълим тизимида юзага келган вазиятдан хулоса қилиш мумкинки, ҳуқуқни муҳофаза қилиш идораларидан бевосита рағбат олган ва жиноятлари авф этилишидан илҳомланаётган коллеж директорини энди тўхтатиш қийин. Боз устига мамлакат Олий ва ўрта махсус таълим вазирлиги маҳаллий фуқароларнинг арз-додларига қулоқ солмаётган, қонунбузарликларни тафтиш қилмаётган экан вазият яна-да мураккаблигича қолаверади. Ўзбекистон инсон ҳуқуқлари “Эзгулик” жамияти эса прокуратура органларидан мазкур воқеа юзасидан изоҳ сўрайди.
« Олдинги хабар Хабарлар рўйхати Кейинги хабар »