17 августдаги хабарларимиздан бирида Озорбайжон Бош Прокуратураси бу мамлакатдаги Фатхулла Гулен тарaфдорларига қарши жиноий иш бошлагани, бу ишнинг марказида Озорбайжон Халқ Жабҳаси Партиясининг лидери Али Керимли тургани айтилаётгани ҳақида хабар берган эдик. Ундан аввалроқ, аниқроғи, 26 июлда Туркия ташқи ишлар вазири Meвлут Човушўғлининг “Фатхулла-гуленчиларнинг Марказий Осиёдаги базаси Қирғизистондир. Гуленнинг тарафдорлари Қирғизистон ҳукуматига ҳам кириб олганлар, давлат тўнтариши қилишлари мумкин” деган сўзларини ҳам келтирган эдик. Қирғизистон расмийлари, жумладан, Президент Алмазбек Атамбаев дарҳол “Турклар бизнинг ишимизга бурнини тиқмасин” деган маънаода жавоб берган эдилар.

Кеча Туркиядаги энг катта “Миллиёт” газетаси Қирғизистон армиясига юрт ташқарисидан қурол олиб келиш билан шуғулланган туркиялик бизнесмен Сердар Ўзюртнинг саргузаштларини унинг ўзига асосланиб ёритди. Нимамиш, Қирғизистонда сал кам ҳамма ерда жойлашиб олган турк фатхулла-гуленчилар Сердар Ўзюртдан бир неча миллион долларлик пул талаб қилишибди, у йўқ деган экан, Қирғизистон хавфсизлик хизмати унга қарши босим бошлабди, у зўрға Туркияга қочиб қолибди. Сердар Ўзюрт тўғри гапираётган бўлса, фатухулла-гуленчилар Қирғизистоннинг хавфсизлик хизматини ҳам ўзларига бўйсундириб олганлар. Дарвоқе, у фаутхулла-гуленчиларнинг Марказий Осиё бўйича имоми, яъни раҳбари борлигини, у ҳам олдига келганини тилга олган.

Озорбайжонда воқеаларга муносабатни қоғоздагина бор бўлган Озорбайжон Демократик Кучлари Миллий Кенгашининг раиси Жамил Гасанли билдирди. Унинг айтишича, Али Керимлидек демократнинг фатхулла-гуленчилар билан алоқаси борлигини иддао қилаётган Озорбайжон ҳукуматининг таркибида Фатхулла Гулен ташкилотининг одамлари етарлича бор. Демак, Фатхулла Гулен тарaфдорларига қарши очилган жиноий иш доирасида мавжуд ҳукуматнинг Фатхулла Гулен билан алоқалари текширилиши керак.

Хуллас, қаёққа қараманг, Фатхулла Гулен атрофида масахарабозликдан нарига ўтолмайдиган гаплар юрибди, қилинаётган қандайдир ишлар ҳам масхарабозликдан узоққа боролмайди. Тўғри, Туркиянинг ўзида Эрдўғон ҳукумати собиқ сафдошлари бўлган фатхулла-гуленчиларга қарши катта ишлар қилмоқда. Аммо, бу катта ишлар катта масхарабозликдан бошқа нарса эмас.

Нима ҳам дердик, қолаверса, бу воқеалар Ислом динининг ҳозирги ғариб аҳволини ўзида акс эттирмоқда.