Бу мамлакатда 15-чи июлдан 16-чига ўтар кечаси давлат тўнтаришига уриниш мувафаққиятсизликка учраганидан кейин, Президент Эрдўғон ўзи президентлик лавозимига кўтарилишида ҳал қилувчи роль ўйнаган Фатхулла Гуленга қарши тахт учун кураш доирасида бироз аввал бошланган урушини янада юқори нуқтага олиб чиқди.

Қаранг, нималар қилинди? Туркиядаги генерал-адмиралларнинг сал кам учдан бири Фатхуллачи Террор Ташкилоти (ФТО) билан алоқадорлик иддаолари остида ишидан ҳайдалди, кўпчилиги ҳибсга олинди. Минглаб хусусий мактаблар ва 7 та университет ФТО билан алоқаси борликда айбланиб, бекитиб ташланди. Минглаб судья ва прокурорлар ҳам айнан шу сабаб билан ишдан ҳайдалди, анчагина қисми ҳибсга олинди. Бир неча профсоюз ташкилотлари, ўнлаб газеталар бекитилди, ўнлаб профсоюз фаоллари ва журналистлар ҳибсга олинди. Туркиядек мамлактнинг ҳамма профессорларига Туркиядан чиқиш тақиқланди. Яъни, уларнинг ичида фатхулла-гуленчилар кўпчилик эканлиги гумон қилинмоқда.

Бу ҳам етмади, шекилли, Ўзбекистон ва бошқа Совет республикалардаги Фанлар Академияларига ўхшаш бўлган, аммо бор йўғи бир мингдан озгина кўпроқ ходими бўлган Туркия Илмий ва Технологик Муассаса ходимларнининг кўпчлиги айнан ўша айблар билан ишдан ҳайдалди. Куласизми, йиғлайсизми?

Мен ўша Туркия Илмий ва Технологик Муассасасининг раҳбари билан Туркияга қочиб келган йилларимнинг бошида учрашганман, дейди “Бирлик” Партияси раиси Абдураҳим Пўлат. Ўшанда у муассасада тозловчилардан тортиб, унинг раҳбаригача, ҳаммасини бўлиб, 800 одам ишлар экан. Роса ҳайрон қолган эдим, чунки, мен ишлаган Кибернетика марказида 3 минг атрофида хизматчи бор эди. Ўзбекистон Фаналар Академиясида эса, 16 минг атрофида хизматчи бор бўлган. Шуларни айтганимда, Туркия Илмий ва Технологик Муассасаси раҳбарининг оғзи очилиб қолганлиги ҳозир ҳам эсимда. Ҳозир бу муассаса ходимларининг сони эндигина 1 мингдан ошган экан.

Ислом Карим ҳам мендан ўч олиш учун 21 аср илм-фанининг рамзи бўлган Кибернетика Марказини бектиб ташлаган эди, энди Эрдўғон унинг қилган ишларни қайтармоқчими?

Туркия ақлдан озаётганини кўрсатувчи бошқа мисоллар ҳам кўп. Мана баъзилари.

- Ўтган йили Россия учоғини Туркия чегараларини бузишда айблаб уриб туширган Туркия учоғининг пилоти фатхулла-гуленчи эмиш. У ҳозир ҳибсга олинди. Куласизми, йиғлайсизми?

- 5-6 йил аввал Жумҳурият Халқ Партиясининг ўша пайтдаги раиси Дениз Байкал ўз партиясидан парламентга сайланган бир аёл билан ялонғич ҳолда тўшакда ётганини кўрсатувчи видео эълон қилинган ва Дениз Байкал дарҳол истеъфога кетган эди. Буни Эрдўғоннинг топшириши билан давлатнинг хавфсизлик хизматлари қилганига ҳеч кимда шубҳа йўқ эди. Аммо, ҳозир Эрдўғоннинг ҳукуматидагилар бу видео давлатнинг хавфсизлик органларига кириб олган фатхулла-геленчилар тарафидан олингани ва тарқатилганини айтишга бошладилар. Куласизми, йиғлайсизми?

- Бундан бир неча йил аввал машҳур турк хонандаси Иброҳим Тотлисесни, уни Ўзбекистонда ҳам кўпчилик танийди, ўзи билан пул талашган ҳамтовоқлари ўлдиришга ҳаракат қилишган, аммо ифлослиги аввалдан маълум бўлган хонанда ярим фалаж бўлса ҳам тирик қолган эди. У ҳозир, табиий, эрдўғончиларнинг кўрсатмаси билан, фатхулла-гуленчилар ўзини ўлдириш ниятида бўлганларини иддао қилишга бошлади. Куласизми, йиғлайсизми?

Ҳозир Ражаб Эрдўғон ва унинг одамлари фатхулла-гуленчилар давлатнинг ҳамма тизимларига сизиб кириб олганларини иддао қилмоқдалар. Агар фатхулла-гуленчилар шундай қилган бўлсалар ва буни Эрдўғон ҳукумати кўрмаган бўлса, Эрдўғон иш билмаслигини тан олиб, дарҳол истеъфога кетиши керак.

Абдураҳим Пўлат, “Бирлик” ва “Ҳаракат”нинг фикрича эса, фатхулла-гуленчилар давлат тизимларига сизиб кириб олганлари йўқ, улар Эрдўғон билан билан бирга эдилар, демак, давлат органларининг ҳаммасида уларнинг бўлиши табиийдир. Ҳозир бу икки гуруҳ тахт талашиб, ўзаро уришга кирди. Бу Туркиянинг охири бўлиши мумкин.

Қаранг, Туркияда ҳам шуни тушунадиган одамлар бор экан. Икки кун аввал онамухолифат партияси, яъни бир вақтлар буюк Отатурк тарафидан қурилган Жумҳурият Халқ Партиясининг раиси Кемал Қиличдорўғли ўз партияси фаолларининг йиғилишида айнан шундай деди: “Улар (яъни, фатхулла-гуленчилар - “Ҳаракат”) давлат тизимларига сизиб кирганлари йўқ, уларни режали равишда олиб киришган”. Ҳақиқатни кўра билган Қиличдорўғлига “Офарин!” дейиш керак.

Эртага, яъни 7 августда Туркиядаги ҳокимият Истанбулдаги Янгиқапи (Янги дарвоза) майдонида “Демократия ва Шаҳидлар Митинги” ўтказишни режалаштирган ва унга мухолифатдаги Жумҳурият Халқ Партияси ва Миллиётчи Халқ Партиси лидерларини ҳам таклиф қилган. Аввалига, Жумҳурият Халқ Партияси лидери Кемал Қиличдорўғли “Ҳокимият мухолифатни ҳам ишлатиб, ўзининг обрўсини ошириб олмоқчи” деган иддао билан у митингга ўзи бормаслигини эълон қилди, аммо кейин фикрини ўзгартириб, митингга келишини билдирди.

“Ҳаракат”нинг фикрича, Кемал Қиличдорўғлининг охирги қарори тўғридир. У митингда қатнашиши, нутқ сўзлаши, исённи қоралаши ва энг муҳими, ҳозирги ҳокимиятни Туркияни исломлаштириш йўлидан қайтишга чақириши, акс ҳолда, Туркия йўқ бўлишини дипломатик усул билан бўлса ҳам билдириши керак.