01 August 2016
16:44 - “Ҳаракат” яна ҳақ чиқмоқда: Путин ва командасининг мақтанишларига қарамасдан, Россия иқтисодининг чўкиши давом этмоқда
Россия Қримни ва феълан Донбассни босиб олганидан кейин Ғарб давлатлари Россияга қарши 2014 йил ёз ойларида киритган санкциялар ва ундан кейин нефтнинг нархи тушиб кетиши натижасида бу мамлакатнинг иқтисоди оғир аҳволда қолгани ҳаммага маълум. Аммо, айниқса, 2016 йилда Россия Президенти Владимир Путин ва унинг одамлари рецессия битгани, иқтисоднинг тушиши тубига етгани ва энди кўтарилишга бошлагани ҳақида гапиришга бошладилар.

Ўзбек аслли Россия миллиардери Алишер Усмонов эгаси бўлган gazeta.ru cайти ўз қўлида Олий Иқтисод Мактаби номли Илмий-Тадқиқит Университети томонидан тайёрланган Россия иқтисодининг бугунги аҳволи ҳақидаги ҳисобот борлигини айтиб, ҳисоботнинг қуйидаги тафсилотларини бугун эълон қилди.

Ҳисоботга кўра, 2016 йилнинг биринчи ярмида Россия иқтисодида янги рецессия бўлди ва аввал туб деб ҳисобланган даражадан ҳам пастга тушиш кузатилди.

Ялпи Ички Маҳсулот ҳажми туб деб ҳисобланган даражани ҳам тешиб, пастга тушишни давом эттирмоқда. Ҳозир ВВП тубдагидан 1,4 фоиз пастда тушган, 2014 йилга нисбатан эса, 5,5 фоизлик тушиш бор.

Энг катта фалокатга қурилиш сектори учраган, бу соҳада ярим йиллик тушиш 10 фоизга тенг. Чакана савдо айланмасида ярим йиллик тушиш 3,1 фоиз бўлди, 2014 йилга нисбатан тушиш 15 фоиз.

Бу аҳволда, дейилади ҳисоботда, яқин орада барқарор ўсиш бўлишини кутиш мумкин эмас. Бу йил ЯИМ яна 1,5 фоизга тушса керак, нефтнинг нархи тушиб кетиши туфайли давлатнинг Резерв Фонди битишга яқинлашиб қолади.

Аввалги хабарларимизда, дейди мухбиримиз, Россиянинг собиқ молия вазири, Дмитрий Медведев президент бўлган пайтда у билан чиқишолмагани сабабли ҳукуматдан отилган Алексей Кудрин Владимир Путиннинг иқтисодий масалалар бўйича феълан бош маслаҳатчиси этиб тайинланганини билдирган эдик. Айнан Алексей Кудрин ҳам Россия иқтисодини ҳар тарафлама жиддий ислоҳотларсиз тиклаб бўлмаслигини гапириб келмоқда.

“Ҳаракат”нинг фикрича, бундай ислоҳотлар Россия Қрим ва Донбассни Украинага қайтариши билан натижаланиши керак. Акс ҳолда, Ғарбнинг санкциялари давом этаверади ва охир-оқибатда Россия СССРга ўхшаб парчаланиб кетади.
« Олдинги хабар Хабарлар рўйхати Кейинги хабар »