08 June 2009
02:33 - Украинада яна Виктор Юшченко ғолиб келди, Тимошенко-Янукевич коалицияси тузилмасдан бузилди
Зарғалдоқ инқилобининг маликаси Юлия Тимошенко ўша кунлардаги ғояларини оёқ ости қилиб, руспараст Регионлар Партиясининг раиси Виктор Янукевич билан парламент ва ҳукуматда коалиция қилиш, Конституцияга ўзгартиришлар киритиш, хусусан, президентни парламент сайлайдиган система яратиш устида ишлаётгани маълум бўлиб қолгач, 2 кун аввал президент Виктор Юшченко баёнот тарқатди, телевидение экранларига чиқди ва янги коалициянинг режаларини давлат тўнтариши, демократияни йўқ қилиш, деб баҳолади. Ҳозир бунинг акс-садолари кела бошлади.

Бугун эрталаб Виктор Янукевич янги коалиция режаларини тўхтатиб туриш, президент сайловларидан кейингина бу масалага қайтиш хусусида баёнот берди. Унинг фикрича, ҳозир Конституцияга ўзгартиришлар киритадиган замон эмас, президентни ҳалқ сайлаши керак, янги сайланган президент халқнинг мандати билан ҳамма ватанпарвар, миллатпарвар кучларни бирлашириши керак.

Бир оздан кейин ТВ экранлари орқали халққа мурожаат қилган Юлия Тимошенко Виктор Янукевични колиция тузиш режаларини бузишда айблади ва ўзи президент сайловида иштирок этажагини, сайловни ютиш учун қатнашажагини урғулади.

Катта сенсация яратиши кутилаётган ва гўёки Украинанинг тақдирини ҳал қиладиган коалиция режалаштирилаётгани бутун миллатга маълум бўлиб қолгандан кейин, воқеаларнинг бу йўналишда кетиши, Тимошенконинг ҳам Янукевичнинг ҳам обрўсини тушириши, бу босқичда ҳам яна Виктор Юшчеко ютиб чиққани шак-шубҳасиздир.
« Олдинги хабар Хабарлар рўйхати Кейинги хабар »