Исроилда 17 март куни бўлиб ўтган парламент сайловларнинг узул-кесил натижалари кеча эълон қилиниши керак эди. Натижалар эълон қилинди шекилли, Исроил Президенти Реувен Ривлин 120 кишилик парламентда 30 ўринга эга бўлиши бир неча кун аввал маълум бўлган “Ликуд” Партиясининг лидери, жорийдаги Бош вазир Биньямин Натаньяхуга янги ҳукумат тузишни топширгани кеча кечқурун эълон қилинди. У 2-3 ҳафта ичида ҳукумат тузишни мўлжаллаётганини айтди.

Бўлажак Бош вазирни тушуниш мумкин. Унинг партияси Кнесетда биринчи ўринда бўлса ҳам, бор-йўғи 30 депутати бор. Аввалги хабарларимиздан маълумки, яна иккита партиянинг 24 ва 13 депутати бор. Бошқа майда партияларнинг депутатлари сони 5 билан 11 орасида. Демак, камида 61 депутатни ўз ичига оладиган ҳукумат коалицияси тузиш осон бўлмайди.

Биньямин Натаньяхунинг бошқа ташвишлари ҳам бор. У сайловдан олдин, ўз партияси ғалаба қозонса, Филистин давлати тузилмаслигини эълон қилганди. АҚШ Президенти Барак Обама бунга кескин қарши чиқиб, “Исроилнинг узоқ замонли хавфсизлигининг гарантияси икки давлат тузилишида, мен Натаняхуга айтдимки, унинг сайлов олди баёнотлари тўғри ечимга келишни қийинлаштиради”, деган эди.

Натаньяху компромисс қидиришга бошлади ва “Биз филистин қўшниларимизга тинчлик қўлини узатамиз. Исроил халқи биладики, бизнинг ҳақиқий келажагимиз Исроил кучли бўлгандагина бўлади” деди. Тўғри, Филистин давлатини тан олиш айтилмади, лекин шу тарафга кичкина қадам қилинди, деса бўлади.