25 March 2015
15:39 - Қирғизистонда ИШИДнинг фаолияти тақиқланди, навбат Ўзбекистонга, аммо бу етарасиз. Исломни Абдураҳим Пўлат айтгандек ислоҳот қилиш керак!
Бу мамлакат ахборот воситалари билдиришича, Миллий Хавфсизлик Комитети ва Бош прокуратура биргаликда ИШИДни террористик ва экстремистик деб тан олиш талабини аллақачон суд органларига топширган экан. Бишкек шаҳар Октябрь туман суди бу таклифни қарорга айлантириш билан бирга, ИШИДнинг Қирғизистонда фаолиятини ҳам 13 февралда тақиқлабди, бу қарор 16 мартда кучга кирибди. Нима учун бу ҳақда энди хабар берилаётганини тушуниш қийин. Тахмин қилиш қийин эмаски, Қирғизистон раҳбарларининг ўзи бу ҳақда аниқ фикрга эга эмаслар. Яна тахмин қилиш мумкинки, Ўзбекистонда ҳам шу каби суд қарорлари чиқарилса керак.

Аммо, дейди мухбиримиз, ИШИДни таъқиқлаш билан бу муаммони ҳал этиб бўлмайди. Чунки, Қуръоннинг ҳозирги таҳлили, тўғрироғи, тафсирига кўра, давлат исломий бўлиши керак. ИШИДнинг асосий мақсади айнан Оллоҳ берган Қуръоннинг буюрганини қилишку. Демак, Қуръоннинг ҳозирги тафсири кучда қолар экан, ИШИД ҳақ ва у Ислом динининг муқаддас талабини амалга оширмоқда. Ал-Қоида ва Толибонни, энди ИШИДни Ғарб куч билан йўқ қилолади. Аммо, кейин бошқалари чиқаверади.

Бу аҳволдан қутилишнинг битта йўли бор, бу - кечаги хабарларимиздан бирида келтирилган Абдураҳим Пўлатнинг сўзларидадир: “Қуръоннинг мавжуд тафсирига ишонган исломчи террористларни ҳеч қачон йўқ қилиб бўлмайди. Бу вазиятдан чиқишнинг ягона йўли – Қуръонни янгидан тафсир қилиш ва давлатнинг исломий бўлиш кераклиги ҳақидаги ақидадан воз кечиб, дунёвийлик/секуляризм принципини тан олишдир. Акс ҳолда, исломий террорнинг сўнги, Ислом дунёсининг келажаги бўлмайди.”

Ҳа, Ислом уламолари Абдураҳим Пўлатнинг бу гапларини амалга ошириш устида ишлашлари керак. Аммо, минг афсуски, Ислом дунёсида замонавий муаммоларини тушунадиган уламоларнинг ўзи йўқ. Ўзини шайх деб атаб юрган Муҳаммадсодиқ Муҳаммадюсуф кабилар бундай нарсаларни тушунмасдан ўлиб кетаверадилар. У ҳолда Исломни ислоҳат қилиш билан сиёсатчилар шуғулланиши керакми?

Абдураҳим Пўлатнинг айтишича, у “Ҳаракат” агентлигининг вакили сифатида АҚШ Давлат Котиби Жон Керри ва Афғонистон Президенти Ашраф Ғанининг душанба куни АҚШ президентининг Кэмп Дэвид қароргоҳида ўтказилган матбуот конференциясига атайлаб борган. Исломнинг ислоҳотга муҳтожлиги хусусида савол бериш учун борган. Аммо, маълум бўлишича, савол бериш ҳаққи аввалдан келишилган журналистларга берилар экан. Абдураҳим Пўлат ўз саволини беролмаган, бу мавзуни кўтаролмаган. Аммо, бу тарихий мавзу эртами кечми кун тартибига чиқади. Бу нарса Ўзбекистоннинг келажаги учун ҳам ўта муҳимдир. Чунки, жоҳилликда ўзбек мусулмонлари араблардан қолишмайдилар.

Расмда – Абдураҳим Пўлат Кэмп Дэвид қароргоҳининг матбуот конференциялари ўтказиладиган залида. Расмни каттароқ қилиш учун уни курсор билан босинг.
« Олдинги хабар Хабарлар рўйхати Кейинги хабар »