21 March 2015
07:27 - Ўзбекистонда яна бир диний секта фош қилинди (Тўлатилган вариант)
Ўтган ҳафтада ҳуқуқ-тартибот идоралари томонидан “Азалий Олий Отанинг Азалий Уйи” (Изначалный Дом Изначально Вышестоящего Отца - ИДИВО) номли диний секта фаолиятига чек қўйилди. 12news.uz веб нашрининг ёзишича, иш юзасидан 48 киши қўлга олинган. Уларнинг 3 нафари Россия, икки киши эса Қозоғистон ва Қирғизистон фуқароларидир.

Оқим асосчиси Россиянинг Ставрополь ўлкасида яшовчи Виталий Сердюк бўлим, у бошчилигидаги оқим аллақачон Қозоғистоннинг Остона, Олма-Ота, Чимкент, Сариоғоч, Темиртов, Қарағанда шаҳарларида ўз бўлинмаларига эга бўлган. Оқим вакилларининг Беларусга кириб боришга бўлган ҳаракатларигина мазкур давлат ҳуқуқ-тартибот идоралари томонидан тўхтатилган.

Маълум бўлишича, Россия фуқароси Тамара Даова ҳар ой икки кунга Тошкентга ташриф буюриб, махсус “семинар-тренинг”лар ўтказган. У тингловчиларни ўз оқимига киришга даъват этган, оқимга кирганлар эса унга ойига 100 доллардан тўлаб туриши керак бўлган. Шу тариқа Тамара Даова 6 ой ичида ўзбекистонлик тарафдорларидан 30 минг доллар тўплаб олган.

ИДИВОнинг сайтида кўрсатилишича, дейди мухбиримиз, бу янги дин деса ҳам бўладиган оқим Виталий Сердюк тарафидан ўртага отилган Метагалактика қонунларини ўрганиш ва Синтез философияси яратиш ғояларига асосланган ва 1991 йил 5 январда расман тузилган. Унинг логосида чормих борлиги насронийликка ишорат каби кўринса ҳам, буни аниқ айтиш қийин. ИДИВОнинг 191 филиали рўйхатида Тошкентдаги филиал ҳам кўрсатилган.
« Олдинги хабар Хабарлар рўйхати Кейинги хабар »