18 February 2015
08:35 - Масхарабозлик бўйича эстафета таёқчаси Брунейдан Фиджига ўтди
Аввалги хабарларимизда Бруней Ўзбекистон билан дипломатик алоқаларни йўлга қўйишга қизиқиб қолганидан ажаблангандик. Бугун эса Ўзбекистoн Республикаси Ташқи ишлар вазири Абдулазиз Комил Фижи Республикасининг фавқулодда ва мухтор элчиси Филимон Кауни қабул қилгани ҳақида хабар тарқалди. Фижининг мамлакатимиздаги биринчи элчиси ҳам брунейлик ҳамкасбидек Ўзбекистон Республикаси Президенти номига йўлланган ишонч ёрлиқларини топширибди. Худди Брунейнинг элчиси каби Фиджиники ҳам Тошкентда ўтирмайди, унингқароргоҳи Сеул шаҳрида.

Аҳолиси Брунейникидан икки баравар кўп бўлган мазкур мамлакатнинг элчиси билан ҳам бир қатор халқаро муаммолар ҳам муҳокама қилинибди. Жаҳон сиёсий харитасида кўзга ташланавермайдиган бу орол давлат билан яккамохов бўлиб қолган Ўзбекистон қандай халқаро муаммони гаплашиши мумкин, қизиқ.

Тахмин қилиш мумкинки, “Ҳаракат” Агентлиги Ислом Каримга Ўзбекистонни яккамоховга айлантириш айбини қўявергач, у Абдулазиз Комилга димломатик фаолиятни кучайтириш ҳақида кўрсатма берган. Натижада, бечора Абдулазиз Комилнинг куни Бруней ва Фиджи каби давлатлар билан масхарабозлик қилишга қолган. Чунки, тузукроқ давлатларнинг Ўзбекистон билан иши йўқ, уларнинг Марказий Осиёдаги фаворити Қозоғистон ва унинг Президенти Нурсултон Назарбойдир.
« Олдинги хабар Хабарлар рўйхати Кейинги хабар »