27 December 2014
07:17 - Нью-Йорк фондлар бозори яна тарихий рекорд ўрнатди, АҚШ иқтисоди мисли кўрилмаган даражада юксалмоқда
Жорийдаги ҳафтада Нью-Йорк фондлар бозори қутураётгани, Dow Jones индекси тарихда биринчи марта 18 мингдан ошганини аввал хабар қилгандик. Кеча Dow Jones индекси яна бир тарихий рекорд ўрнатди ва 18103 га чиқди. Бозор бекилганда Dow Jones 18054 да тўхтади.

Ўтган ҳафтани Dow Jones 17805 билан битирган эди. Яъни, ҳафталик ўсиш 249 бўлди. Аммо, муҳим бўлгани, Dow Jones индекси тарихий чўққиларда мустаҳкамланаётгани.

Аввал ҳам айтган фикримизни такрорлаймиз. Dow Jones индекси АҚШнинг энг катта 40 та компанияси акцияларининг ўртача нархини кўрсатгичидир. Демак, энг катта компаниялар, яъни, мамлакат иқтисодининг мотори деса бўладиган ширкатлар, мисли кўрилмаган кучга эришдилар.

АҚШ иқтисоди кризисдан чиқиб бўлиб, янада мустаҳкамланмоқда. Россия эса чўкишга бошлагани, Хитойда ҳам бу йилги иқтисодий кўрсатгичлар ўсиш кўрсатмаётгани ёки кўп кўрсатмаётганини ҳисобга олсак, АҚШ жаҳоннинг ягона лидерига айланаётганини тан олиш керак бўлади.

АҚШда ишлаётган ўзбеклар ҳам, бошқа мамлакатларда яшаётганўзбеклар ҳам, фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.

Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар чет элларда ҳам ош ейиш ва Ўзбекистонга пул юборишдан ташқари, ишлаётган мамлакатларида пул йиғиб, кичкина бўлса ҳам ўз бизнесларини очиш устида ўйласалар, фойдали бўлади.

Айнан шундай одамлардан кейинчалик катта бизнесменлар чиқади. Ана ундан кейин Ўзбекистонда ҳам бизнес очишни ўйлаш мумкин. Акс ҳолда, бутун дунёни мардикорлар билан тўлатиб юраверамиз.
« Олдинги хабар Хабарлар рўйхати Кейинги хабар »