19 декабрь куни Тожикистон Президенти Имомали Раҳмон Хатлон вилоятининг Данғара туманида Марказий Осиёда энг катта текстиль корхонаси қурилишига старт бериди, дейилади Asia-Plus агентлигининг хабарида. Бу корхонанинг таркибида тўртта фабрика бўлади – йигирув, тикувчилик, тўқиш ва бўёқ фабрикалари. Хитойнинг ёрдами билан қуриладиган корхонада АҚШ, Европа Иттифоқи ва Хитойдан олинадиган станоклар ва технологиялар ишлатилади.

Биринчи навбати 2015 йилда иш бошлайдиган корхона йилига 52 минг тонна пахта толасини қайта ишлайди, 150 млн квадрат метр мато ишлаб чиқаради, бу ерда 600 киши ишлайди.

Маълумки, Тошкент текстиль комбинати ўз вақтида СССРдаги энг катта текстиль корхонаси эди. Унинг ҳозирги ишлаб чиқариш қувватлари ҳақида маълумот тополмадик. Шу туфайли Тожикистонда қурилаётган корхона ростдан ҳам Марказий Осиёда энг катта бўладими, деган саволга жавоб йўқ.

Лекин шу нарса аниқки, “Бирлик” тузилганидан бери чет элга пахта толаси сотиш аҳмоқлик эканлиги, пахтани Ўзбекистонда матога ва тайёр кийимга айлантириб сотилса, ўнлаб-юзлаб баравар кўп фойда олиш мумкинлиги, жуда кўп иш жойлари яратилиши ҳақида гапиради. Аммо, Ўзбекистондаги мавжуд режим “Бирлик”нинг таклифларига жинояткорона қулоқ солмади.

Ҳозир бу йўналишда ишлар жадаллаштирилмоқда, аммо жуда кеч қолинди. Энди текстиль саноати билан Ўзбекистоннинг ўлаётган иқтисодини қутқариб бўладими, деган саволга ҳам жавоб йўқ.