Кеча Россия Президенти Владимир Путин мамлакат Конституциясининг талаби бўйича парламент – Федерал Мажлис олдидаги йиллик мактуб/мурожаатини Федерал Мажлиснинг иккалла палатаси - Сенат ва Давлат Думаси ҳамда ҳукумат аъзолари олдида эълон қилди.

Россиянинг иқтисоди Ғарб киритган санкциялар остида рецессияга кетаётган, рублнинг қиймати ўпирилиб тушаётган, Давлат Бюджети учун муҳим аҳамиятга эга бўлган нефтнинг нархи тушиб кетаётган пайтда Федерал Мажлис, қолаверса, Россия халқи олдига чиқиш Путин учун осон эмасди. Айнан шу сабабдан у ўзининг ва халқнинг руҳини кўтаришни муржаатнинг асоси қилиб олгани тушунарлидир.

Унга кўра, ҳозир Россия шундай кучайиб кетмоқдаки, уни кўролмаган Ғарб Украинадаги кризисни баҳона қилибгина Россияга қарши санкциялар киритмоқда. Украина бўлмаса ҳам биронта баҳона топиб Россияга қарши санкциялар киритиларди.

Путин ўзи ва Россия ҳеч нарсадан қўқмасдан олға кетаверишини кўрсатиш учун яқин йилларда қилинадиган оламшумул ишлар ҳақида гапирди. У ҳеч уялмасдан, Россияда болалар боғчаларида жой етишмаслигини йўқ қилишни ҳам гапириб, Россияни юксак миллий технологик ташаббуслар мамлакатига айлантириш, бунинг учун чет элларда фан соҳасида ишлаётган россиялик мутахассисларни қайтариб келиш режаларини тилга олди.

Мамлакат олға кетаётганини кўрсатиш учун, Путин ёлғон гапиришдан ҳам тоймади. Дедики, ҳозир россияликларнинг ўртача умри 73 ёшга чиқди. Ваҳоланкги, русларнинг Москвада жойлашган Гуманитар Технологиялар Маркази БМТнинг Ривожланиш Дустури номли ташкилоти билан биргаликдан олиб борган тадқиқотларига кўра, Россияда ўртача умр 69 га тенг. Жойи келгани учун айтиш керакки, бундай ёлғонларни Ўзбекистон Президенти Ислом Карим ҳам доим гапириб келади. Масалан, шу йил бошида у Вазирлар Маҳкамасининг 2013 йил натижаларига бағишланган мажлисида бизда ўртача умр 71 эканлигини айтган эди. Гуманитар Технологиялар Марказининг сайтида айтилишича, Ўзбекистонда ўртача умр 68,6. Аслида, бу рақам ҳам кўпиртирилган бўлса керак.

Табиий, Путин ўз мактуб/мурожаатида Украинада атрофида бўлаётган воқеаларни четлаб ўтолмаган. Кўринишидан, унинг спичрайтерлари роса ишлашган ва Путиннинг докладига қўйидаги сўзларни тиқиштиришган: “Россия учун Қрим, қадимий Корсун, Херсонес ва Севастополь каби буюк маданий ва сакраментал маънода аҳамиятга эга. Унинг сакраменталлиги Қуддусдаги Ибодатхона тоғи мусулмон ва иудейларга муҳимлиги кабидир. Буиз бунга шундай қараймиз ва бу абадий бўлади.”

Ўз-ўзидан маълумки, русларнинг ҳам, Россия парламенти аъзоларининг ҳам, кўпчилиги “сакраментал” сўзини биринчи марта эшитишган ва уни тушунишмаган ҳам. Сакрамекнтал дегани, қисқа ва қўполроқ қилиб айтсак, илоҳийлик демакдир.

Тушунарлики, Путин Қримнинг босиб олинишини ўзича оқлаш учун, бу масалага диниий руҳ бермоқда.