15 November 2014
12:12 - Австралиядаги саммитда ҳам Пекиндаги аҳвол: Иккили учрашувлар, якка баёнoтлар
9-10 ноябрь кунлари Пекинда ўтказилган Осиё-Тинч Океани Иқтисодий Ҳамкорлиги (ОТИҲ) ташкилотининг саммити ҳақидаги хабаримизда “Қоғоздагина бор бўлган ОТИҲ баҳона - лидерлар учрашуви ғанимат!” иборасини ишлатган эдик. Аслида ҳам шундай бўлди, саммитининг ўзида пичоққа илинадиган гап ҳам бўлмади, пичоққа илинадиган биронта қарор ҳам қабул қилинани йўқ. Қолаверса, ҳозирги глобаллашув асрида жаҳон лидерларининг иккилик учрашувлари жуда муҳим аҳамиятга эгадир.

Бугун Австралиянинг Брисбен шаҳрида ўтказиладиган ёки ўтаётган G20 cаммити ҳақида ҳам юқиридаги гапларни айтиш мумкин. Ҳозир Брисбенда мақаллий вақт бўйича соат 19:12. Аммо, ҳалигача G20 саммити бошланиб-бошланмаганини ҳам билиб бўлмайди. Турли иккилик учрашувлардан ташқари, Бразилия, Россия, Ҳиндистон, Хитой ва Шимолий Африка Республикаларидан иборат ташкилотнинг лидерлари ҳам алоҳида учрашув ўтказиб олдилар. Бу учрашув қатнашчилари Ғарб тарафидан Россияга қарши киритилган санкцияларни ноқонуний эканлигини айтишибди.

Россия Президенти Владимир Путин Италия Бош вазири Маттео Ренци ва Буюкбритания Бош вазири Дэвид Кэмерон билан учрашди, унинг Франция Президенти Франсуа Олланд ва Германия Канцлери Ангела Меркел билан учрашувлари режалаштирилган. Бу учрашувларда ҳам асосий мавзу Украинадаги кризис бўлади. Дарвоқе, G20 cаммити кун тартибидан ҳам Украина масаласи бор. Тахмин қилиш қийин эмаски, лидерлар у ерда умумий тил тополмайдилар, демак, жиддий қарор қабул қилинишини ҳам кутиш керак эмас.

Бугун АҚШ Президенти Барак Обама Квинсленд Университетида нутқ сўзлади. У яна Россияни ИШИД ва Эбола хавфи билан солиштирди, АҚШ бу уччала хавфга қарши курашаётган супердавлат эканлигини таъкидлади. Унинг ҳам Путин билан учрашуви бўлиши гапирилмоқда. Аммо, амалда нима бўлишини ҳеч ким билмайди.
« Олдинги хабар Хабарлар рўйхати Кейинги хабар »