Ўрсиларнинг Vesti нашри Туркия Бош вазири Ражаб Тойиб Эрдўғаннинг бундан кейин Барака Обама билан гаплашмасликка қарор қилгани ҳақида ёзибди. Маълум бўлишича, Эрдўғон Обамадан АҚШнинг Ғазо мсаласида Исроилга кўмак бераётганидан хафа экан. У Ғазо секторида мусулмонларнинг ўлдирилишини геноцид деб айтаб, буларнинг ортида АҚШ турганини иддао қилибди. Туркия ҳукумати раҳбари шу боисдан бундан сўнг Барака Обама билан гаплашмасмиш.

Эслатиш керакки, Туркия Сурия президенти Башар Асадга нисбатан қаттиққўллик билан муносабатда бўлиб, суриялик жангариларни қўллаб-қувватламоқда. АҚШнинг Суриядаги низоларга ҳарбий аралашувдан бош тортганини турк ҳукумати «хоинлик» деб баҳолаган. Ҳатто Эрдўғон “Авваллари тўғридан-тўғри Обамага мурожаат қилар эдим. Бироқ Сурия бўйича кутган натижаларимни кўрмаётганим учун, энди музокараларни ташқи ишлар вазири олиб боради”, дебди.

Бироқ Туркия ҳукумати раҳбари АҚШ вице-президенти Жо Байден билан алоқани узгани йўқ ва тез-тез телефонлашиб туради. Эрдўғоннинг бойкоти АҚШга қаршими, Обамагами, буни ҳам тушуниш қийин. Қолаверса, у яқинда президентлик курсисига ўтиради, ўшанда ҳам Обама билан гаплашмайдими?

Русларнинг хабари анчагина субъектив кўринмоқда. Туркия ҳозир Ғарбдан юз ўгириш ҳаракатида бўлаётгани кўриниб турибди, бу ҳақда "Ҳаракат" мухбирлари кўп гапиришмоқда. Мана бу - жиддий нарса.