25 June 2014
14:20 - Россия парламентининг Федерация Кенгаши Украинага рус қўшинларини киритиш рухсатини бекор қилди
Давлат Думасининг Федерация Кенгаши бугунги мажлисида Путиннинг таклифи билан рус қўшинларини Украинага киритиш учун берилган рухсатни бекор қилди. Мажлисда Федерация Кенгашининг 170 сенаторидан 154 нафари қатнашган. 153 сенатор Путиннинг таклифини қабул қилишга овоз берган, ягона сенатор қарши чиққан.

Шундай қилиб, Федерация Кенгаши айнан Путиннинг таклифи билан шу йил 1 март куни чиқарган қарорини бугун бекор қилди. Керак бўлса, бу қарор эртага қайтадан қабул қилинади. Қўғирчоқ Сенатдан нима ҳам кутиш мумкин.

Украина Президенти Петр Порошенко эса, Россиянинг бу қарорини ўз тинчлик режасини бажариш йўлидаги қадам деб баҳолади ва олқишлади.

Аммо, НАТО Россияга қарши янги санкциялар киритмаса ҳам, у билан алоқаларни музлатиб қўйиш ҳаққидаги аввал олган қарори амалда ишлайверишини айнан бугун эълон қилди. Демак, Ғарбда ҳеч ким Россиянинг бугунги қарорини жиддийга олмоқчи эмас. Оғзаки турли баёнотлар бўлиши мумкин, аммо, амалда ҳеч нарса ўзгармайдиганга ўхшайди.

Дарвоқе, Федерация Кенгашининг бугунги мажлисида унинг раиси Валентина Матвиенко Қримни Украинага қайтариш тўғрисида гап ҳам бўлиши мумкин эмаслигини, Қрим де-факто ва де-юре Россиянинг бир қисми эканлигини алоҳида урғулади.
« Олдинги хабар Хабарлар рўйхати Кейинги хабар »