Кўринишидан, “Ироқ Левант Исломий Давлати” номли ташкилот Ироқ ва Сурия суннийлари тарафидан тузилган. Ироқда ҳокимиятда шиалар, Сурияда эса шиаларга яқинлиги билан билинган алавийлар бўлган сабабли, уларга қарши суннийларнинг ташкилоти ўртага чиққанини қайсибир маънода тушуниш ҳам мумкин. Аммо, “Ироқ Левант Исломий Давлати” ташкилотининнг бировлар террористлар, бировлар жангарилар деб айтаётган қуролли кучлари Ироқнинг расмий армиясидан кучлироқ бўлиб бораётгани одамни ҳайрон қолдирадиган воқеадир.

Бу ташкилотнинг оёққа туриб бориши нафақат Ироқ ва Сурияда, балки бутун Яқин Шарқда катта ўзгаришларга йўл очиши мумкин. Чунки, Саудия Арабистони “Ироқ Левант Исломий Давлати” ташкилотини қўллаб-қўллаётгани айтилмоқда. Саудиянинг энг яқин ҳамкори АҚШ эса, Ироқдаги расмий ҳокимиятни, яъни шиалар асосий роль ўйнайдиган ҳокимиятни қўллаб-қувватламоқда. АҚШнинг биринчи душмани бўлган Эрон ҳам айнан шу ҳокимиятни қўллаб-қувватлаётгани вазиятни яна ҳам чигаллаштиради.

Амалда эса, “Ироқ Левант Исломий Давлати” ташкилотининг жангарилари секин-аста Ироқни босиб олмоқдалар. Улар мамлакат шимолидаги вилоятларни босиб олгалари, кейин мамлакат пойтахти Боғдоднинг биқинидаги энг катта нефтни қайта ишлаш заводини босиб олганларини аввал хабар қилган эдик.

Жаҳон агентликлари бугун тарқатган хабарларга кўра, “Ироқ Левант Исломий Давлати” (ИЛИД) ташкилотининг жангари/террористлари Боғдодга яқин жойлашган яна бир нечта шаҳарчани босиб олишибди ва ҳатто Ироқ ҳарбий-ҳаво кучларининг Ясриб шаҳридаги энг катта ҳарбий базасига ҳужум қилишибди. Улар базани босиб олишолмаган, аммо ким билсин, эртага нима бўлади.

Reuters агентлигининг сайтидан олинган расмда ИЛИД жангариси.