20 June 2014
07:18 - Фатхулла Гуленнинг мактабларини Озорбайжонда ҳам бекитишмоқда
Озорбайжонда Фатхулла Гуленнинг “Хизмат” ташкилотиники деб ҳисобланадиган “Араз” курслари ва 11 лицей бекитилгани кеча эълон қилинди, деб хабар беради бу мамлакатдаги мухолифатга яқинлиги билан билинган Соntact.az сайти. “Араз” курслари олий ўқув юртларига кириш истагидаги ёшларни имтихонларга тайёрлаш билан шуғулланар экан.

Таълим соҳасида эксперт ҳисобланадиган Мурсал Алиевнинг фикрича, бу қарор таълим ва бизнес соҳасининг сифатини туширишга хизмат қилади. Чунки, бекитилаётган “Араз” курслари ва лицейлар юқори савияда таълим берардилар, уларни битирганлар юксак даражали профессионаллар бўлишади.

“Араз” курслари ва лицейлар сиёсий сабаб билан бекитилаётган бўлиши мумкин, чунки улар турк диний уламоси Фатхулла Гуленга яқин ҳисобланади. Яқинда Озорбайжонга келиб кетган Туркия Бош вазири Ражаб Эрдўғон эса, бу мамлакатда нурчилар (Фатхулла Гулен тарафдорлари) тармоғи яхши ташкилотланганидан норози. Эрдўғонга кўра, айнан Фатхулла Гуленнинг “Хизмат” ташкилоти Туркияда давлат органларига сизиб кириб, ҳукуматга қарши бузғунчилик ишлари олиб бормоқда.

Эрдўғон Озорбайжонга келиб кетгандан кейин Озорбайжон ҳукуматнинг юқори даражали лавозимларида ишлаётган ва нурчилар ташкилотига алоқаси бор деб ҳисобланадиган одамлар ишдан бўшатилди.

Маълумки, Россия ва Ўзбекистонда ҳам Фатхулла Гуленнинг “Хизмат” ташкилотига тегишли деб ҳисобланадиган лицейлар аллақачон бекитиб ташланган, бу ташкилотга яқинлик кўрсатаётган одамларни ҳатто қамашган.

Аслида, шундайми? Фатхулла Гуленчилар шунчалик хавфлими? Нимага АҚШдек давлат Фатхулла Гуленга бошпана берди? Бу саволларга тўғри жавоб излаш лозим.
« Олдинги хабар Хабарлар рўйхати Кейинги хабар »