Ҳозир Хитой таркибида бўлган Уйғуристоннинг пойтахти Урумчи шаҳрида 22 май куни уюштирилган террористик ҳужум натижасида 39 киши ҳалок бўлгани, ярадорларнинг сони 100 га яқин эканлиги ҳақида биз ҳам хабар берган эдик.

Шундан кейин, аниқроғи, 23 май куни расмий номи “Шинжон-уйғур мухтор ўлкаси” бўлган Уйғуристонда Хитой ҳукумати тарафидан бир йил давом этадиган антитеррор операция режими киритилган экан. Шу операция доирасида 22 майдаги ҳужумларни тайёрлашда иштирок этганлиги гумон қилинаётган 29 киши ҳибсга олингани бугун хабар қилинди.

Эслатиб ўтамиз, 22 майдан олдин ҳам Уйғуристоннинг Хитойдан мустақил қилиш мақсадида фаолият олиб бораётган уйғур жангарилари бир қатор террористик актлар уюштиргандилар. Масалан, ўтган йили октябрь ойида Пекиннинг Тяньаньмэнь майдонида уч ўлимчи-жангари автомобилларнини туристлар гуруҳига уриб портлатганларида жангариларнинг ўзидан ташқари 2 турист ўлганди.

Бу йил март ойида эса, Хитойнинг Юньнань провинциясидаги Куньмин шаҳарида жангариларнинг пичоқлар билан уюштирган ҳужумларида 29 киши ҳалок бўлган, 140 киши ярадор бўлганди.

Бу мавзу бўйича аввал ҳам берган таҳлилимизни қайтарамиз.

Хитой ҳукумати Уйғуристонга кўпроқ эркинлик бериш, унинг Уйғуристон номини тиклаш, ахир бир кун номи Туркистон бўладиган ҳозирги Марказий Осиёдаги мамлакатлар билан алоқа йўлларини очиш каби замонавий усуллар билан терроризмдан қутилиш мумкинлигини тушуниши керак. Бошқа тарафдан, Марказий Осиё мамлакатларининг ҳаммасида ҳозир диктаторлик режимлари ҳукмрон. Бу мамлакатлар демократлашган сари уларнинг Уйғуристон масаласига эътибори кучайиши ҳам шубҳасиздир.