Нурсултон Назарбойнинг таклифи билан тузилган “Осиёда Алоқалар ва Ишонч Кенгаши” (ОАИК) ташкилотининг тўртинчи саммити бугун Шанхайда ўз ишини бошлади. У ерда нутқ сўзлаган Қозоғистон Президенти бу ташкилотни “Осиёда Хавфсизлик ва Тараққиёт Ташкилоти”га (ОХТТ) айлантиришни таклиф қилар экан, шундай қилинса, ОХТТ - Европада Хавфсизлик ва Ҳамкорлик Ташкилотининг (ЕХҲТ) яхши маънода конкуренти бўлишини таъкидлабди.

Бу ҳақда хабар берган Казинформ агентлиги бугун Шанхайдаги саммитнинг биринчи куни бўйича матбуот конференцияси ўтказилганини ҳам билдиради. Бу тадбирни Қозоғистон ва Хитой раҳбарлари Нурсултон Назарбой ва Си Цзиньпин ҳамда Туркия Ташқи ишлар вазири Аҳмет Довутўғли биргаликда ўтказишибди.

Матбуот конференциясида Шанхайдаги саммитнинг якуний Декларацияси қабул қилингани ҳам айтилган. Аммо, қозоқларниннг хабарида Декларациянинг тафсилотлари ҳақида ҳеч нарса йўқ. Саммит ўз ишини битириб-битирмаганини ҳам тушуниб бўлмайди.

Тахмин қилиш қийин эмаски, қоғоздагина қолган ЕХҲТдан ўрнак олиб тузилган ОАИК ташкилоти ҳам ҳаётини қоғозда сурдиради.