20-21 май кунлари Пекинда тўла номини ўзбекчасига “Осиёда Ўзаро Алоқалар ва Ишонч Меъёрлари” (ОАИ) ёки қисқароқ қилиб “Осиёда Алоқалар ва Ишонч” (ОАИ) деб атаса бўладиган ташкилотининг тўртинчи саммитида иштирок этиш учун кеча бу ерга келган Ўзбекистон Президенти Ислом Карим бугун Хитой Халқ Республикаси раиси Си Цзиньпин тарафидан қабул қилинди.

ЎзАнинг хабарида икки мамлакат ўртасидагаи алоқаларга оид жуда кўп рақамлар келтирилса ҳам, бугун икки лидер нима ҳақида гаплашгани умумий шаклда ёритилган. Тахмин қилиш қийин эмаски, шунчаки расмиятчилик учунгина, хўжа кўрсинга учрашув ўтказилган. Саммитнинг мезбони меҳмонларнинг ҳаммаси ёки кўпчилигини шу шаклда қабул қилса ажаб эмас.

Солиштириш учун айтиш керакки, саммит баҳонасида ўтган куни Хитойга давлат ташрифи билан келган Қозоғистон Президенти Нурсултон Назарбой кеча Си Цзиньпин билан музокаралар олиб борди, натижада икки мамлакатнинг турли даражадаги расмийлари иқтисодий ҳамкорликни кучайтиришга қаратилган сал кам 2 млрд долларлик лойиҳалар бўйича 6 та шартнома имзоладилар. Нурсултон Назарбой ва Си Цзиньпин эса, икки мамлакат ўртасидаги стратегик ҳамкорлик ва келажакдаги алоқаларни ривожлантириш масалаларини ўз ичига олувчи Қўшма Декларацияга имзо отдилар.

Икки лидер бу билан ҳам чекланмасдан, Хитойнинг Цзянсу провинциясидаги Ляньюньган портида Қозоғистоннинг логистик терминалини қурилишига старт бердилар. Бу портни қозоқ юкларини ташишда ишлатиш бўйича Қозоғистон-Хитой шартномаси 1995 йилда имзолган бўлиб, шу йилнинг бошида “Қозоғистон Темир Йўллари” ва “Ляньюньган порти” компаниялари “Қозоқ-Хитой халқаро Ляньюньган компанияси” номли қўшма корхона яратишган экан.