29 April 2014
20:17 - Сенсация: Туркия Бош вазири Фатхулла Гуленни экстрадиция қилишни АҚШдан сўрамоқчи
Reuters агентлигининг бугунги хабарига кўра, кеча Туркия Бош вазири Ражаб Эрдўғон АҚШдаги ҳар ким ҳам танийвермайдиган PBS телеканалига берган интервьюсида АҚШ ҳукуматидан Туркиядан қочиб, бу мамлакатда из ихтиёри билан яшаётган Фатхулла Гуленни ушлаб беришларини сўраш ниятида эканлигини айтибди.

Анчагина мавҳум бўлган бу ният катта акс-садо беришга бошлаганининг сабаби – аввал исломчиларнинг машҳур “нурчилар” оқимининг лидери бўлган Фатхулла Гулен ҳозир ўзининг мустақил “фатхуллачилар” ҳаракати/жамоати яратгани ва бу ҳаракат/жамоатнинг тарафдорлари кўпайиб кетиб, Туркиядаги ҳокимият структураларини ҳам яхшигина эгаллаб олишгани ҳамда унинг моддий имкониялари жуда катта бўлиб кетганидир.

Алоҳида урғулаш керакки, фатхуллачилар ўтган йилнинг охиригача Ражаб Эрдўғонни қўллаб-қувватлашарди, айнан шу сабабдан уларга ҳокимият структураларига кириш имконяти берилганди.

Аввалги хабарларимиздан маълумки, Ражаб Эрдўғон ва униннг одамлари айнан фатхуллачиларни 17 декабрь операциясини уюштиришда айбламоқдар. Ўша операция доирасида Ражаб Эрдўғон ҳукуматининг коррупция ва порўрлик ўчоғига айланиб кетгани фош қилинганди. Бир қатор вазирларнинг ўғиллари ва бир қатор ҳокимият одамларининг уйларида картон қутиларда сақланаётган миллионлаб евро ва долларлар топилганди.

Ражаб Эрдўғон эса, бу фактлар бўйича текширувлар ўтказиш ўрнига, фатхуллачилар жамоатининг операциясини ўзига, оиласига, партиясига ва Туркияга қарши фитна деб эълон қилди. Унинг партияси 30 март куни ўтказилган маҳаллий сайловларда, аввалгисидан камроқ овоз билан бўлса ҳам, ғалаба қозонди.

Шу йил август ойида Туркияда президентлик сайловлари ўтказилиши керак. Туркия парламент давлати бўлгани учун, президентнинг ваколатлари катта эмас, парламент тарафидан тайинланадиган Бош вазирнинг ваколатлари катта. Аммо, Ражаб Эрдўғон президент бўлиб сайланмоқчи ва кейин Конституцияга ўзгартиришлар киритиб, Туркияни президент давлатига айлантирмоқчи, деган фикрга Туркияда ҳамма кўникиб бўлди. Кўринишидан, Эрдўғон айнан шундай қилмоқчи ва бундан аввал Фатхулла Гуленнинг жамоатини нейтраллаштирмоқчи. Табиий, ишни жамоатнинг лидери Фатхулла Гуленни нейтраллаштиришдан бошлашмоқчи.

Эслатиб ўтиш керакки, Фатхулла Гулен яқин одамлари билан 15 йилча аввал, яъни Ражаб Эрдўғоннинг исломий илдизли Адолат ва Тараққиёт Партияси ҳокимиятга келмасдан олдин ўтказилган бир йиғилишда “Туркияни исломий давлатга айлантириш учун, авваламбор қадамма-қадам армияни қўлга олиш керак” маъносида гапирган ва унинг сўзлари ёзилган лента ўша пайтдаги ҳукуматнинг махсус хизматлари қўлига тушиб қолганди. Дунёвий давлатчиликка қарши одам сифатида қўлга олинишини ўз вақтида билиб қолган Фатхулла Гулен ўша пайтда АҚШга гўёки даволаниш учун келиб, ўшандан бери Пенсилвания штатидаги қаср каби уйда яшайди.
« Олдинги хабар Хабарлар рўйхати Кейинги хабар »