08 April 2014
23:34 - Ўзбеклар ҳавас қилсин: Украина парламенти Олий Радада аёл депутат эркак депутатга мушт урди
Украинадаги воқеалар қандай шиддатли кетаётгани ҳақида кўп ёздик, ўзбеклар ҳавас қиладиганлари ҳам йўқ эмас.

Расмда кўриб турганингиздек, Олий Раданинг аёл депутати эркак депутатга мушт урмоқда. Бу аёл – миллатчи руҳдаги “Озодлик” Партияси рўйхати бўйича сайланган депутат бўлиб, мушт еган депутат эса, руспарастлиги билан танилган Коммунистик Партиянинг лидери Петр Симоненкодир.

Петр Симоненко парламентдаги ўз чиқишида Украинанинг ҳозирги аҳволга тушишида мухолифатнинг айби бор, деган экан, минбар олдига югуриб чиққан аёл депутат унга бир неча марта мушт урибди. Хабарлардан бу аёлнинг исми берилмади. Унинг партиядошлари дарҳол ўртага кириб, Симоненкони манбардан зўрлаб тушириб юборишган, кейин сўл ва ўнг қанот партияларнинг вакиллари ўзаро жанжал қилишган.

Мажлисни олиб бораётган парламент спикери Александр Турчинов дарҳол 10 минутлик танаффус эълон қилибди. Аммо тарафлар тезда келишиб олгандан кейин, яъни 5 дақиқа ўтар-ўтмас, парламент ўз ишини давом эттирибди.

Парламент мажлисидан жонли эшиттириш олиб бораётган парламент телеканали ўз ишини узмасдан давом эттирди, дейилади расмий хабарда.

Кейинчалик бир орага келган турли партиялар фракцияларининг раҳбарлари бундай ҳолларга бошқа йўл қўймаслик ҳақида келишишибди.

Парламентдаги муштлашишни ҳеч ким оқлашга ҳаққи йўқ. Аммо, мамлакатда оғир вазият юзага келган экан, ундан чиқиш ниятида олиб борилаётган шиддатли воқеалар доирасида эркак парламент аъзосига мушт отган аёл депутатни қоралаш ҳам тўғри бўлмасди.

Айниқса, Ўзбекистонда депутатлар ҳар қандай шароитда жим қолаётганлари уларни оқлай олмайди. Қани энди ўзбек депутатлари ҳам миллатнинг келажаги ҳал этилаётган масалаларда, ҳеч бўлмаса, муштларини ишга солиб борликларни кўрсатсалар эди, биз буни олқишлаган бўлар эдик.
« Олдинги хабар Хабарлар рўйхати Кейинги хабар »