08 April 2014
20:44 - Украинада аҳвол ўша-ўша, аммо қизиқ, Украина учун ижобий, тенденциялар бор
Украинанинг жанубидаги Луганск, Донецк ва Ҳарьков вилоятларида, тўғрироғи бу вилоятларнинг марказларида Россия махсус хизматлари тарафидан бошқарилаётгани иддао қилинаётган маҳаллй рус сепаратист гуруҳлар билан ҳукумат орасидаги қарама-қаршилик давом этмоқда. Аввал хабар қилганимиздек, Донецк ва Харьков вилоятларида қандайдир кучлар ўзларини мустақил республикалар деб эълон қилишди, Россиядан армия киритишни талаб қилишди, маҳаллий ҳокимия биноларини босиб олишди.

Охирги хабарларга кўра, Харьков ва Донецкдаги ҳокимият биноларидан рус сепаратистлари чиқиб кетишган. Асли донецкли Укранинанинг энг катта бойи, бир маҳаллар руспарастларнинг Регионлар Партияси орқасида турган кучли исмлардан бири бўлган Ринат Аҳметов ишга аралашиб, икки тарафни ҳам муаммоларни музокаралар йўли билан ечишга чақиргани энг катта воқеа деб ҳисобланмоқда. Россия билан ҳам алоқалари яхши бўлган бу миллиардер-сиёсатчининг бу ишларга аралашиши, Путин ҳам эҳтиёткорлик йўлига ўтгани, Қрим масаласи бўйича қилинаётган Ғарбнинг босими билан ҳисоблашишга мажбур бўлаётганини кўрсатиши мумкин.

Луганскда эса, сепаратист-террористлар деб айтилаётган гуруҳ Украина Хавфсизлик Хизмати вилоят бўлимининг биносини босиб олди, бинони миналаштиришганини ҳам эълон қилиб, бино ичида бўлган бир неча ўн киши гаровга олинганини билдирди.

Украина ҳукумати ҳамма ерда жуда эҳтиётлик билан иш олиб бормоқда, воқеаларни оловлантирмасдан сиёсий йўллар билан ечишга ҳаракат қилмоқда.

Ғарб, кутилганидек, бу воқеаларда ҳам Украина ҳукумати тарафида, Россия Украина жанубидаги ишларга аралашса, унга қарши санкциялар яна ҳам кучайтирилишини айтиб, Путинни огоҳлантирмоада.

Ҳатто Россия ахборот воситаларининг хабарларига қараганда, рус рублининг қиймати тушмоқда, Россия иқтисодини ёмон кунлар кутмоқда. Масалан, асосий капиталга инвестициялар аввал кутилаётган 3,9% ўсиш ўрнига, Ғарбнинг санкцияларидан кейин 0,1–1,9% га тушиши прогноз қилинмоқда. Россиядан капиталнинг оқиб чиқиши бу йил $100 млрд бўлар экан. Ялпи Ички Маҳсулот эса бу йил бор-йўғи 1,1% ортади.

Хуллас, Украина ҳукуматига осон эмас, аммо Путин ва Россия ҳукумати ҳам ўзини ғалаба қилган тарафдек ҳис этмаяпти. Табиий, агар Путин шундай қарорга келса, Украинанинг жанубий вилоятларини осонликча босиб ололади, аммо келажак нима бўлади деган савол у бечорани роса ўйлатиб қўймоқда.
« Олдинги хабар Хабарлар рўйхати Кейинги хабар »