Дунёнинг диққат марказида Украинадаги воқеалар турган бўлса, туркларнинг диққат марказида 30 мартда бўладиган маҳаллий сайловлар турибди. Бу сайловлар Бош вазир Ражаб Эрдўғон ҳамда у раислик қиладиган исломий илдизли Адолат ва Тараққиёт Партияси учун ҳаёт-мамот масаласига айланган. Чунки, ўтган йилнинг охирида Эрдўғон ҳукуматининг бир қатор вазирлари порхўрлик ва коррупция ботқоғига ботганлари очилиб қолди ва шу пайтгача сал кам Олллоҳнинг энг покиза бандаларидан тузилганлигини иддао қилиб келаётган мавжуд ҳукумат роса шарманда бўлди.

Ражаб Эрдўғон тезда истеъфога кетиш ёки ҳукуматининг айбини тан олиш ўрнига, ҳамма нарсани ўзига, оиласига, партиясига ва ҳатто Туркияга қарши фитна деб баҳолади ва гўёки фитначиларнинг қуроли бўлган Твиттерни Телекомуникация вазирлигининг қарори билан Туркияда очилмайдиган қилиб қўйди. Энг қизиғи, айнан шундан кейин Твиттерга кираётган туркияликларнинг сони икки бараварга ошди ва улар Твиттерга айланма йўллар билан киришаётгани маълум бўлди.

Бундан ҳам қизиғи, бугун Анқара суди Телекоммуникация вазирлигининг Твитерни турклар учун ёпиш қарорини бекор қилди. Твиттер ҳали очилгани йўқ, аммо очилса керак. Аммо, савол туғилади: Анқара суди ҳам финачилар қўлидамикан?

Туркия матбуотида бугун яна бир қизиқ воқеа ҳақида хабарлар чиқди. Туркиядаги кризиснинг сабабчиси, Эрдўғоннинг сўзлари билан айтсак, финачиларнинг бошлиғи, кучли исломий жамоатнинг лидери, ҳозир АҚШнинг Пенсильвания штатида яшайдиган Фатхулла Гулен Бош вазир Ражаб Эрдўғон билан учрашиш ниятини ўз одамлари орқали Бош вазирга етказибди. Аммо, Эрдўғон “йўқ” дебди ва бундан кейин ҳам бундай таклифлар билан олдимга келманглар деган сигнал берибди.