“Яблоко” Партиясининг асосчиси Григорий Явлинский Украинанинг ички сиёсий ҳолатини муҳокама қилиш учун халқаро конференция чақиришни таклиф қилди, дейилади бу партиянинг сайтига асосланиб тарқатилган хабарларда.

Биз, дебди Явлинский, партия ва жамоат ҳаракати сифатида эксперт имкониятларимиз ва халқаро ҳамкорлик соҳасидаги имкониятларимиздан фойдаланиб, Россия ва Украина ўртасида дўстлик ва ҳамкорлик тикланиши учун керакли бўлган ҳамма нарсани қиламиз. Украинаниннг жанубидаги иқтисодий муаммоларни ҳал этиш учун ҳам ҳаракат қилишга ваъда берамиз.

Кремль-Лубянканинг гўёки Украинадаги русларни ҳимоя қилиш кераклиги ҳақидаги пропагандаси остида рус халқининг мутлақо кўпчилиги Путиннинг Қримни босиб олиш режасини қўллаб-қувватлар экан, рус демократлари халқ ичида обрў йўқотишдан қўрқиб, шок ичида суст қолган эдилар. Явлинскийнинг бу баёнотини шу шокдан чиқиш йўлидаги биринчи қадам деб баҳолаш керак.

Табиий, ҳар қандай халқаро конференция Қрим парламентининг Россияга қўшилиш ҳақидаги қарорлари ва бу масала бўйича ўтказиладиган референдум Украина қонунларига зид эканлигини, демак, Қрим парламентининг қарори ҳам, референдум ҳам, ноқонуний эканлигини тан олади.

Рус демократлари шокдан ёки ўзбекчасига айтсак, гангирашдан чиқишга бошлагани яхшилик аломатидир, дейди мухбиримиз. Мавжуд вазиятни ўз вақтида тушунмаслик ботқоғига ботганларни шок терапияси усуллари билан аввал шокка тушириш ёки гангиратиб қўйиш - айнан гангирашдан чиқишни тезлаштиради. “Бирлик” ва “Ҳаракат” айнан шу йўл билан миллат сифатини ҳам йўқотиб бўлган ўзбекни қайтадан миллат қилмоқчи.