У ердан келаётган хабарларнинг мутлақо кўпчлигини исботлайдиган фактлар йўқ, уларни инкор этиб ҳам бўлмайди.

Қримнинг муҳим ерлари аста-секин Россия армияси тарафидан босиб олинмоқда. Аммо, босиб олаётганларнинг формасида улар рус армиясининг ҳарбийлари эканлигини кўрстувчи белгилар йўқ. Тамомийла маҳаллий русларнинг қўлига ўтган Қрим ҳукуматидагилар бу одамлар маҳаллий ўз-ўзини ҳимоя қилиш отрядлари аъзолари эканлигини гапиришмоқда.

Қримда жойлашган Украина армиясининг қисмлари бундан буён Киевга эмас, тўғридан-тўғри Қрим ҳукуматига бўйсунишларини айтибдилар. Украина ҳарбий флотига тегишли бир неча кема Россиянинг Қораденгиз флотига қўшилгани ва Севастополдаги базага келгани ҳам айтилмоқда. Россиянинг Украина билан чегараларида рус қўшинлари гўёки “ҳарбиай машғулот” учун тўпланмоқдалар.

Кеча Россиянинг Федерация Кенгаши Президент Владимир Путинга Россия қўшинларини Украинага киритиш учун расмий рухсат берганидан кейин, Украина тарафи ҳам расман урушга тайёрлана бошланганини кўрсатиш мақсадида умумий мобилизация эълон қилди. Бугун эрталабдан ҳамма ҳарбий хизмат ёшидагилар маҳаллий военкоматларга келиб рўйхатдан ўтишлари керак. Украина сиёсатчилари Севастополдаги Россиянинг Қораденгиз флоти базаси ҳақидаги шартномани бекор қилишга, яъни русларнинг базасини бекитишга чақирмоқдалар. Украинанинг уч собиқ президенти Кравчук, Кучма ва Юшченко эълон қилган расмий баёнотда ҳам айнан шундай қилиш керакли айтилан. Яъни, Украина талвасада эмас, Россияга керакли жавобни бериш ниятида.

Бир маҳаллар Виктор Януковичнинг ишонган тоғларидан бири бўлган Украинанинг энг бой одами Ринат Аҳметов (расмда) ҳамма бизнесменларини, ҳар қандай ҳаражатдан қочмасдан, Украинани кризисдан тинчлик йўли олиб чиқиш учун хизмат қилишга чақирди. Бу ҳам муҳим фактдир.

Ғарбнинг Россияга босими русларнинг ўзи ҳам кутмаган ўлчовларга чиқди. АҚШ, Франция ва яна бир қатор давлатлар шу йил ёзда Сочида ўтказилиши режалаштирилаётган G8 саммитига бормаслик ҳақида сигналлар бермоқдалар. Россия Украинанинг бутунлигини бузса, бунинг бадали оғир бўлишини борган сари кескинроқ шаклда такрорламоқдалар.

Яна бир муҳим нарса шундан иборатки, Россия ўз тажовузкорлигини гўёки Украинадги русларни ҳимоя қилиш билан оқламоқчи, ваҳолангки, украинлар бундай деб ўйлашга асос берадиган биронта қадам ҳам қилмаяптилар ва, кўринишидан, қилмайдилар.

“Ҳаракат”нинг тахмини тўппа-тўғридир. Ҳозир Россиянинг Қримни босиб олишга кучи етади, аммо бундан кейин бошланадиган совуқ уруш натижасида Россия Федерацияси худди СССР каби парчаланиб кетади. Агарда Владимир Путин Қримни Приднестровия, Абхазия, Жанубий Осетия каби осонликча босиб оламиз деб ўйлаётган бўлса, фожеавий янглишади.