21 February 2014
16:05 - Украинада катта ўзгариш йўқ: Ҳукумат чекинишни давом эттирмоқда, қарама-қаршилик кучаймади
Кечаси билан Киевда яна бир неча киши ҳалок бўлгани айтилаётган бўлса ҳам, умумий аҳвол яхши йўналишда ривожланаётганга ўхшайди. Демак, Олий Раданинг чекиниш деб ҳисобласа бўладиган ва кеча кечқурун қабул қилинган антитеррористик операцияни таъқиқловчи қарори ишламоқда. Бу – яхшиликка.

Бугун эрталабдан тушгача Президент Янукович мухолифат лидерлари ва Франция, Германия, Польша давлатларининг ташқи ишлар вазирлари, Россиянинг элчиси ҳамда Россия Президентининг махсус вакили билан учрашувлар ўтказди.

Шундан кейин, ноҳоят ҳукумат билан мухолифатнинг келишув шартномаси эълон қилинди. Унга кўра, Украинанинг 2004 йилда қабул қилинган - президент, ҳукумат ва парламентининг ваколатларини мувозанатини таминловчи - Конституциси кучга киритилади, муддатидан аввал президент сайловлари ўтказилади. Табиий, эски Конституцияни кучга киритиш учун бир қатор ҳуқуқий ишлар қилиниши керак, бу ишлар шу йилнинг сентябригача битирилиши керак. Бундан ташқари, тарафлар 10 кун ичида миллий бирлик коалицияси тузишади.

Бу шартнома қоғозга туширилдими, уни ҳамма тарафлар, хусусан, Ғарб ва Россия вакиллари ҳам имзолшадими, маълум эмас.
« Олдинги хабар Хабарлар рўйхати Кейинги хабар »