18 February 2014
17:05 - Сочида Pussy Riot фаолларининг сўроқ қилиниши Ўзбекистондаги бир воқеани эслатади
Рус ахборот воситалари ҳозигина тарқатган хабарларда айтилишича, Қишки Олимпиада Ўйинлари бўлаётган пайтда ўз ташкилоятининг фаолиятини давом эттириш ниятида Сочига келган русларнинг машҳур Pussy Riot феминистлар ташкилотининг яқинда қамоқдан чиққан ва бутун дунёга машҳур бўлиб кетган аъзолари Надежда Толоконникова ва Мария Алёхина бугун Адлердаги “Малахит” меҳмонхонасида юз берган ўғрилик воқеси бўйича сўроқ қилиш баҳонаси билан миршаблар тарафидан ушлаб кетилди.

Машҳурлиги билан жуда кўп сиёсатчи, санъатчи ва спортчиларни орқада қолдириб кетган бу икки аёлни бироз қўрқитиб қўйиш учунгина яқинда номини полиция деб ўзгартирган милиция бўлимига олиб кетишганини ҳамма тушунади. Уларни тезда қўйиб юборишибди ҳам.

Шу муносабат билан 1990 йил Тошкентда бўлган воқеани эслатиш лозим деб топдик. “Бирлик” халқ ҳаракати (ҳозир “Бирлик” Партияси бўлган) лидери Абдураҳим Пўлатнинг хотираларидан маълумки, унинг 1989 йили СССР халқ депутати, 1990 йили Ўзбекистон халқ депутати бўлиб сайланиш учун қилган ҳаракатлари ва уни йўлини тўсиш учун коммунистик ҳокимият қилган ишлар бўйича саргузаштнома китоблар ёзиш ва кинолар қўйиш мумкин. Ахир бир кун шундай бўлади ҳам.

Бу иккита юксак савияли парламентга сайланишга йўл беришмагач, Абдураҳим Пўлат ҳокимиятнинг ўзига қаршилигининг ўлчовини билиш мақсадида (для спортивного интереса) Тошкент шаҳар Кенгашида бўшаган бир жойга депутат бўлиш ҳаракатини бошлаган. Бутун қаршиликларга қарши уни қайсибир маҳаллада ўтказилган мажлисда депутатликка номзод қилиб кўрсатишган. Тўсиқлар ўта кўп қўйилгани учун, уларни ўтиш ҳам қийин бўлган, аммо номзод кўрсатиш муддатининг охирги куни керакли ҳамма ҳужжатлар тайёрланган. Абдураҳим Пўлат 3-4 нафар дўст-сафдоши билан ўша сайлов округининг раисига ҳужжатларни топшириш учун, ўша раис Бош врач бўлган Себзордаги поликлинага келган. Бош вазир йўқ экан. Дарҳол Марказий Сайлов Комиссиясига телефон қилган бирликчилар шундай жавоб олишди: “Бугун охирги кун, раис жойида бўлиши керак, кутинглар”.

Воқеа ёзда бўлаётгани учун ҳовлига чиқиб, поликлиниканинг эшиги кўринадиган ерда бир скамайкага ўтирдик ва кута бошладик, дейди Абдураҳим Пўлат. Вақт кундузи соат 4 лар эди. Поликлиника 6 да бекилишини ҳам билганимиз учун шу ерда кутадиган бўлдик. Бироздан кейин нималардир бўлаётганини яхши тушунмадим, аммо сездим. Дўстларимга ҳам буни айтдим. Улардан бир айтиб қолди: “Қаранглар сал узоқроқда бутун поликлиника атрофи милиция билан ўраб олинган. Ҳеч кимни бу ерга яқин келтиришмаяпти ҳам.”

Биз кутишни давом эттирдик. Бир неча дақиқадан кейин олдимизга бир нечта миршаб ва уларнинг офицери келишди.

- Абдураҳим ака, - деди у менга мурожаат қилиб, - шу маҳаллада бир автомобиль ўғирланибди. Ҳамма номаълум одамларни ҳужжатини текшириш учун милиция бўлимига олиб бориш буйруғини олдик. Биз Сизни олиб кетишга келдик.

- Мени исмимни ҳам билар экансиз, мен номаълум одам эмасман, нега мени олиб кетишингиз керак, мен бормайман, - дедим.

- Абдураҳим ака, тушунинг, - деди у атрофдаги милиционерларни кўрсатиб, - бизга буйруқ берилганми, барибир олиб кетамиз, яхшиси, тинчгина биз билан юринг.

Нима ҳам қилардик, кетдик. Миршабхонада ҳатто сўроқ ҳам қилмасдан соат кечқурун 6 гача ушлаб туришди, кейин ҳеч нарса демасдан қўйиб юборишди. Поликлиникага борсак, Бош врач соат 4,5 ларда ишга келгани ва соат 6 да иш вақти тугагани учун 15 дақиқа аввал уйига кетганини айтишди.

Табиий, ҳужжатларни топширолмай қолдик, ҳатто шу арзимган сайловда ҳам иштирок этолмай қолдим.

Ҳозир ўша йиллари осонликча Ўзбекистон Олий кенгашига сайланиб олганлар ўша пайтдаги мақомлари билан ҳозиргача мақтаниб юришади. Аслида, уларнинг олдига, Абдураҳим Пўлатга қарши қилинган ишларнинг мингдан бири ҳам қилинмаган. Ўша пайтдаги ҳокимият, шахсан, Ислом Каримнинг ўзи фақат Абдураҳим Пўлатдан қўрқарди, ҳозир ҳам шундай.

Абдураҳим Пўлатнинг сайтимиз архивидаги ўша йиллард олинган расмини кўрмоқдасиз.
« Олдинги хабар Хабарлар рўйхати Кейинги хабар »