Туркиянинг Ўрду шаҳрида 4 қаватли уйнинг юқори қаватидан тушиб кетган 2 ёшли Арас Ўзбек ва уни ушлаб қолиш учун орқасидан ўзини отган 26 ёшли онаси Ойлин Ўзбек ҳақида ўткан куни ва кеча хабарлар берган эдик. Ҳозир Туркия матбуотида ёзилишича, улар бетонли ерга 3-чи қаватдан тушган экан.

Бугун Араснинг аҳволи яхшилашибди, уни реанимациядан оддий палатага олиб чиқишибди. Докторлар бир неча кун ичида Арас касалахонадан чиқариб юборилиши мумкинлигини гапиришмоқда. Болакайнинг ақли-ҳуши жойида, овқат емоқда. Ҳақиқатда мўъжиза.

Эрзрум вилоятидан 60 ёшли бир киши Ойлин Ўзбекга гул ва қуйидаги мазмунли хат юборибди: “Tурк оналарининг юзисан, қандай буюк инсонсан. Қани энди ўз онам каби қўлингни ўпсам”.

Даҳшатли воқеа юз берган вилоятдан мамлакат парламентига сайланган Иҳсон Шенар она-болани касалхонада зиёрат қилибди.

Бир болакайнинг аҳволига кўрсатилаётган эътиборга қараб, “Фамилияси Ўзбек бўлган она-боланинг ҳикояси ўзбекларга дарс бўлсин” дегинг келади. Чунки, қирғиз фашистлари Ўшда Ўзбек аёлининг қорнидан туғилмаган боласини суғуриб олиб, унинг бошини копток қилиб ўйнашганда, дунё бўйича сони 30 миллионга чиққан ўзбеклар қисиб ўтиришганди. Ўзбекистонлик ёш аёл ёки қизлар “Ҳаракат”нинг ҳозир бекитиб қўйилган Фейсбукдаги саҳифасига: “Бизнинг бунақа нарсалар билан ишимиз йўқ, осмонимиз тинч бўлса бўлди”, деб постинглар ёзишган ва ўзбек миллат сифатини йўқотганини кўрсатишганди.