Кеча АҚШнинг Сенатида ёпиқ эшиклар орқасида наркотикларни халқаро назорат қилиш масалаларига бағишланган мажлис ўтказилди. Бу ҳақда Давлат Департаментининг дайжестида хабар берилади. Мажлисда Давлат Котибининг ёрдамчиси Уильям Р. Браунфилд ҳам қисқа нутқ сўзлаган ва дунё наркотикларининг 80 фоизи Афғонистонда етиштирилиши, шу сабабли, давлат бошқаруви, халқ соғлиги ва мамлакат иқтисодига зарар берилаётгани, коррупция ортаётгани ва толиблар қўлига катта пул (йилига 155 миллион доллар) тушаётганини урғулаган.

Табиий, Уильям Р. Браунфилднинг нутқида бу наркотикларнинг қанчаси қайси мамлакатларга бориши айтилмаган, аммо, Афғонистинга қўшни бўлганимизни ҳам ҳисобга олиб, тахмин қилиш мумкинки, ўша наркотикларнинг каттагина қисми Ўзбекистон орқали бошқа давлатларга ташилади, Ўзбекистонда ҳам каттагина қисми қолади.

У АҚШ ҳукумати Афғонистон расмийлари билан наркотиклар етиштириш ва наркотрафикка қарши туриш соҳаларида қилинаётган ишлар ҳақида гапирган ва 2014 йилда АҚШ қўшинлари бу мамлакатни тарк этгандан кейин ҳам наркотикларга қарши кураш бўйича ҳамкорлик давом этишини таъкидлаган.

Ҳеч шубҳасиз, дейди мухбиримиз, АҚШ ва унинг иттифоқчилари Афғонистонни шу йилнинг охиригача тарк этгандан кейин, Марказий Осиё мамлакатлари, биринчи навбатда, Тожикистон ва Ўзбекистон раҳбарлари ислом жангариларининг эҳтимоллиги кам бўлган ҳужумларидан эмас, наркотиклар келиши кўпайишидан қўрқишлари керак.