07 May 2013
23:21 - Ўзбекистонда яна бир масхарабозлик телеканали ишга тушди
Кўпроқ бизнессга оид янгиликлар тарқатиш билан шуғулланадиган Uzreport агентлиги шу пайтгача ўз фаолиятини Интернетдаги uzreport.uz сайтида олиб борар эди. Аслида, ҳукуматнинг қўғирчоғидан бошқа нарса бўлмаган бу сайтда Ўзбекистоннинг иқтисодий ҳаётига оид муҳим маълумотлар, масалан, Ўзбекистоннинг Ялпи Ички Маҳсулоти, Давлат Бюджетига оид муҳим рақамлар ҳеч қачон эълон қилинган эмас. Демак, Ўзбекистон бизнессменларининг Ялпи Ички Маҳсулот ёки Давлат Бюджети каби нарсалар билан иши йўқми? Иши йўқ. Шундай экан, уларни бизнессмен деб бўладими? Йўқ, албатта. Ўзбекистонда ҳеч қандай жиддий хусусий бизнесснинг ўзи йўқ. Майда савдогарчлик ва майда хунармандчилик бор холос.

Хуллас, шу Uzreport агентлиги "Uzreport TV" номли рақамли форматда ишлайдиган телеканал очибди. У мустақил ва нодавлат телеканали эмиш. Ўзбекистонда мустақил телеканал бўлиши мумкинлигига ишонадиган аҳмоқ йўқ, аммо Ўзбекистон ичидаги ҳамма нарса Ўзбекистон давлатиникидир. Ўзбекистонда ҳеч нарса нодавлат бўлолмайди. Аслида, гап ноҳукумат телеканали ҳақида бўлиши мумкин. "Uzreport TV" расман ноҳукумат канал бўлса ҳам, амалда у ҳукуматдан мустақил бўлолмаслигини ҳам ҳамма тушунади.

"Ҳаракат" агентлигининг Ўзбекистонда бўлаётган ҳар қандай янгиликка скептик қараш нияти йўқ. Аммо, жиддийлик билан масхарабозликнинг фарқига бориш бизнинг вазифамиздир. Демак, Ўзбекистонда навбатдаги масхарабоз телеканал очилгани ҳақида гапиришга мажбурмиз.

uzreport.uz сайти уч тилда - рус, инглиз ва ўзбек тиллларида - фаолият олиб бориши иддао қилинса ҳам, аслида унинг асосий тили рус тили эди. Масалан, унинг ўзбекча саҳифасида Uzreport TV телеканали очилгани ҳақидаги хабар ҳалигачи берилмади. Телеканал ҳам асосан рус тилида, балки, фақат рус тилида иш олиб борса керак.
« Олдинги хабар Хабарлар рўйхати Кейинги хабар »