30 April 2013
08:28 - Ўзини "Тошкантлик" деб танитган ўқувчимизнинг саволлари ва Абдураҳим Пўлатнинг ўта қисқа жавоблари
"Ҳаракат" хатқутисига келган хат 10 та саволдан иборат. "Бирлик" Партиясининг раиси Абдураҳим Пўлат 10 саволга 10 та жвоб берди. Улар билан қуйида танишишингиз мумкин.

Тошкантлик: Ассалому Алайкум хурматли Абдурахим Пўлат!  Бирликнинг Харакат сайтини мунтазам кузатиб бораман. Сизнинг фикр ва мулохазаларингиз менинг қарашарларимга жуда яқин бўлганлиги сабабли Сизга саволлар билан мурожат килмокчи эдим.

1. Сизнинг фикрингизча Ислом Каримов қай йўсинда бўлса хам хокимиятдан кетканидан сўнг (вафоти ёки ўз изтиёри билан хокимиятни топширганда кейин) у 23 йил Ўзбекистонда яраткан тизимини қулашини кутиш мумкинми?

2. Ўзбек Халкини яна Миллатга айлантириш учун қанча вакт керак  ва бунга қандай омиллар керак бўлади? Ёки бизнинг халқ пода бўлишга мухкумми?

3. Бугун Ўзбекистон хукумати тепасидагиларда катта ваколатлари хамда жуда кўп пуллари бор, фикрингизча улар осонлик билан бу нарсалардан вос кечишармикин. Ўзини Мухолифат сифатида курувчиларнинг имкониятларини кандай бахолайсиз?

4. Мухолифат вакилларини (хусусан Бирлик азоларини) ватандан кўп йиллар йироқ булгани ва молиявий жихатдан заиф хисобланиши, уларнинг хокимиятга келишини йўққа чикарадими ёки сизнинг фикрингиз ўзгачами?

5. 23 йилдан ичида Ўзбекистонда бошқа бир авлод ва бошка бир жамият вужудка келди, улар 90 йилларда булиб ўткан жараёнларни билмайди хисоб, шу авлодга миллат бўлиш фикри қизиқ бўлади деб ўйлайсизми?

6. Нима деб уйлайсиз, нима сабабдан 23 йил ичида мухолифат вакилларига хеч кайси бир ўзбек бойи ва пулдор одамлар на фикран на маънавий на моддий қушилмади? Молиясиз мухолифат бўлиши мумкинми?

7. Каримовдан кейин унинг қул остидаги амалдорлардан бири хокимиятга келишини кандай бахолайсиз? Улар мухолифат билан келишадиларми ва аксинча мухолифат улар билан хамкорлик қилиши керакми?

8. Маълумки бугунги кунга келиб аксарият юртдаги пул келтириб турувчи манбалар давлатнинг юкори амалдорларига ёки бўлмасам уларнинг қони қариндошларига тегишли. Хатто амалдорлар ўз пулларини ёки хокимиятини купайтираман деб, бир бирларига кариндош уруг булиб олганлар. Кланлар тузишган. Фикрингизча, 23 йил ичида Ватанида хусусий мулкчиликни шакллантираман деб ўз бизнесини нолдан тузган ва бизнесини юкори амалдорларга, уларнинг қариндошларига олдириб қуйган одамларга бизнеслари қайтариб берилиши керакми? Бунинг хукукий принциплари бўлмагани сабабли Каримовдан сўнг муажаро ва жанжаллар чиқиши одамлар ўз мулкларини зўравонлик ёки кўча принципларида қайтариб олинишини олдини олиш учун нималар қилиш керак деб ўйлайсиз?

9. Ўзбекистон  денгизга тўгридан тўгри чиқа олмагани сабабли, ахолисини куп булгани учун, сув муаммоси актуал булган мамлакат булгани учун иктсодий ночор, унинг кисмати русларгагина тоъбэ бўлишга мажбур деган фикрга муносабатингиз? Тилла, Уран ва Газ захираси жуда кўп бўлган мамлакат нима учун мардикорлар хисобига яшайдиган булиб колган? Оч ва саводсиз одамларни бошкариш хам осон деган иборага кўшиласизми?

10.  Ўзбекистонда инкилобий узгаришлар килиш керак деган гапингиз жуда катта гапдир. Унинг амалиётини хаётга тадбик килиш реалми? Агар бўлса юкорида берилган саволлар уни ўзида мужассам киладими?

Жавоблар учун олдиндан катта рахмат
Хурмат ила Тошкантлик

Абдураҳим Пўлат: Бизга эътибор кўрсатиб йўллаган саволларингиз учун раҳмат. Ҳеч қандай киноясиз айтаманки, ҳар бир саволингиз Ватанимиз ва Миллатимизнинг келажаги билан боғлиқ бўлган фундаментал масалаларни кўтаради. Уларнинг ҳар бирига камита битта мақола билан жавоб бериш керак. Аминманки, бундай жавоб-мақолалар ҳамма учун қизиқарли, бундан ҳам муҳим бўлгани, фойдали бўларди.

Лекин.... Ўзбеклар ҳамма гап "лекин"дан кейин бошланишини гапиришади. Мен ҳам Ўзбекман. Лекин, дейман, ҳар бир саволга биттадан мақола ёзиш учун вақтим йўқ. Саволга жавоб истаганлар "Ҳаракат" Агантлигининг harakat.net cайтига кириб, у ердаги материалларни ўрганишлари керак. Ўша сайтдаги менинг ва бошқа сафдошларимнинг мақолаларида ҳамма саволларга жавоб бор. Тўғри, Ўзбекистонда бу сайтга блок қўйилган. Аммо, бу каби блокларни бузиб ёки айланиб ўтиш йўллари ҳозир жуда кўп. Ўз миллатининг тақдирини ўйлайдиганлар энг камида бундай йўлларни топишга эришишлари керак.

Шундай бўлса ҳам, ўзини Тошкантлик деб кўрсатган кишининг саволларига ўта қисқа жавоблар бериб ўтаман.

1. Ислом Карим ҳокимиятдан кетиш-кетмаслигидан қатъий назар унинг режими қулайди. Чунки, бу режим шунчалик аҳмоқларча қурилганки, қорамолга айлантирилган ўзбеклар ош ейиш ва туалетга боришдан бошқа ҳеч нарса билан ишлари бўлмагани учунгина оёқда турибди. Бу қуруқ гап эмас. Фикримизни исботловчи фактларни шу пайтгача ўзбеклар билишмасди ҳам, қизиқишмасди ҳам. Энди сайтимизни ўқийдиганлар билишадики, иқтисоднинг асосий кўрсатгичи бўлган киши бошига Ялпи Ички Маҳсулот ҳажми бўйича Ғарб мамлакатларидан 20-40 баравар орқада эканлигимизни қўйиб туринг, қўшнимиз Қозоғистондан 8 баравар орқадамиз. Ва бу фарқ йилдан-йилга ортиб бормоқда, иқтисодимиз чўкмоқда. Чет элларда қуллардек мардикорлик қилаётган миллионлаб ўзбеклар юбораётган пул ҳисобига Давлат Бюджети зўрға оёқда турибди. Қозоқларда ўртача ойлик 670 доллар, бизда 80-85 доллар атрофида. Бу режим ўз-ўзидан ҳам битади. Аммо, уни чиройли қилиб ўзимиз йиқитмасак, Ўзбекистон деган давлат йўқ бўлади.

2. Ўзбек халқини қайтадан миллат қилиш кераклигини тушунган фақат "Бирлик"ми, демак, бу ишни фақат "Бирлик" қилолади ва қилади. Бошқа ҳеч қандай омил йўқ, пайдо бўлмайди ҳам. Ўз миллатдошлари қирғин қилинганда қисиб ўтириб қорамолга айланган ўзбеклар миллатга айланмаслик учун бизга жон-жаҳди билан қаршилик кўрсатишлари ҳам табиий, демак ҳамма нарса "Бирлик"нинг кучига боғлиқ. Вақти келгани учун шуни ҳам айтмоқчиманки, мен ўта амбицияли одамман. Дунёда амбицияла одамлар кўп. Аммо, амбициянинг орқасида ўшанга яраша куч бўлиши керак. Билиб қўйинки, ўзбеклар митингни ўзини қўйиб туринг, митинг сўзидан қўрққан пайтда ўзбекларни тарихда биринчи митингларга олиб чиққанман. Ислом Каримнинг репрессияларидан кейин Ўзбекистонда мухолифат йўқ бўлди деб ҳамма ишониб юрган пайтда, "Бирлик"даги сафдошларим билан 2001-2003 йиллари Ўзбек демократик мухолифатини тиклаганман. Ҳозир учинчи марта тикланаябмиз, бу сафар миллий ғоя биринчи ўринга қўйилмоқда. Қисқа қилиб айтсак, миллат сифатини йўқотган подани қайтадан миллат қилиш масаласини биринчи бўлиб мен тарифладим, уни бирликчилар билан ўзим амалга ошираман. Бундан ташқари, ҳалокат ёқасида турган динимизни ислоҳот қилиб,  Исломнинг ягона фарзи Имон эканлиги ҳамда Исломда дунёвийлик принципи тан олиниши шартлигини ҳам мен таклиф қилдим. Кўрасиз, айнан шундай бўлади.

3. Ҳозир Ўзбекистонда ҳокимият Ўзбекнинг душманлари қўлида. Улар учун пул ҳам муҳим, аммо асосий мақсадлари ўзбекларнинг қайтадан миллат бўлишига йўл бермаслик. Улар Лубянкага хизмат қилишади, демак, ҳеч қачон пулсиз қолишмайди. Ўзбеклар оч қолса ҳам, мавжуд ҳукуматни ушлаб туришга русларнинг пули етади.

4. "Бирлик" ҳеч бир замон юрт ташқарисида бўлмаган, доимо юрт ичида фаолият олиб борган. Мавжуд режимнинг ҳамма саъй-ҳаракатларига қарамасдан, "Бирлик" нисбатан жуда кучли ташкилот. Ичимиздан чиққан Ўзбекнинг сотқинлари ёрдамида бизни заифлаштиришди ва ҳозир ҳам сотқинлар ёрдамида бизни заифлаштириш учун қўлларидан келган ҳамма нарсани қилишмоқда. Қийин, аммо олға кетмоқдамиз.

5. Янги етиштирилган қорамоллар авлодини ҳам шок терапияси усуллари билан одам қилишдан бошқа йўлимиз йўқ. Ҳозир бу ишни қилаяпмиз. Имкониятларимиз доираси жуда кичик бўлишига қарамасдан, нисбатан жуда ҳам катта иш қилаётганимизни ҳар қандай ақли бор одам тан олишга мажбур.

6. Фақат камбағаллар қорамолга айланган эмас, бойларимиз ҳам шундай. Улардан ҳеч қандай ёрдам кутаётганимиз йўқ. Аммо, шундай кун келадики, улар халқнинг ғазабидан қутилиш учун бизга ёрдам бериш учун навбатга турадилар.

7. Ислом Каримдан кейин ким ҳокимиятга келиши шахсан мени ҳеч ҳам қизитирмайди. Биз ўзбекларни қайтадан миллат қилолсак, ҳар қандай анти-ўзбек ҳокимият бир кунда йўқ қилинади. Бу масалада Ўзбекистонлик тожиклар ўзларини тўғри тутишлари ҳам жуда муҳим. Ҳозирча, улар ўзбекларнинг аҳволидан хурсанддек кўринмоқдалар. Бу уларнинг жудда катта хатоси, келажакда ўзларига ёмон бўлади. Оғир аҳволдан чиқишда улар ўзбеклар билан елакма-елка турсалар, келажагимиз учун яхши бўлади.

8. Ҳар қандай режим ўзгаргандан кейин жамиятда катта силкинишлар бўлади. "Бирлик"нинг ўзи шундай мудҳиш силкинишлардан ўттики, у тажрибамиз билан Ўзбекистонни келажакда бўладиган ҳамма силкиниш ва алғов-далғовлардан бемалол ўтказиб оламиз. Биздан бошқа ҳеч ким қилолмайди бундай ишни.

9. Русларнинг ўзи шундай ёмон аҳволдаки, Ўзбекистон оёққа туришга бошлаши билан, яқин атрофларидаги энг катта нославян ва нонасроний куч бўлган ўзбеклар билан ҳамкорлик қилишга мажбур бўладилар. Табиий, биз лубянкафурушлардан фарқли ўлароқ, Ўзбекнинг манфаатларини ҳеч кимга сотмаймиз. Ҳар қандай ҳамкорлик тенгликка асосланади. Биз учун Туркия ҳам жуда муҳим. У ерда ҳам жуда мураккаб жараёнлар кетмоқда, биз доим хушёр бўлишимиз лозим.

10. Инқилобий ўзгаришларсиз Ўзбекистон қайтадан оёққа туролмайди. Бундан ташқари олдимизда катта уруш турибди. Мени тўғри тушуниш керак. 1990 йили "Ўзбекистон мустақил диктатура остонасида" номли мақола ёзганимда, мен диктатура бўлишини истмаганман. Аммо, қонли диктатура келаётганини башорат қилганман. Мана, ўтирибмиз ўша қонли диктатурада. Ҳозир ҳам мен урушни истамайман. Аммо, башорат қиламанки, Марказий Осиёда катта урушнинг олдини олиб бўлмайди ҳисоб. Агар қирғизлар ва қозоқлар Ўзбекни ўз тарихий ерларидан сиқиб чиқариш ниятлари ва сиёсатларидан вақтида воз кечсалар, қирғизлар қирғиз фашизмини ўзлари жазоласалар, ички чегараларни тан олмайдиган Марказий Осиё ёки Туркистон Бирлиги каби давлат тузиш лойиҳасини тезлик билан амалга ошириш йўлида ўзбеклар билан ҳамкорлик қилсаларгина, балки, урушни ҳатлаб ўтиш имкони бўлар. Кўр ҳассасини бир марта йўқотади дейдилар. Менинг аввалги башоратимни жиддийга олмаган ўзбекларга  ҳам иккинчи марта ҳасса йўқотишларига йўл қўймаслик бизнинг вазифамиз.
« Олдинги хабар Хабарлар рўйхати Кейинги хабар »