30 April 2013
19:29 - БМТ минбарида сўкиниш: эстафета ўзбеклардан туркманларга ўтди, иштони йўқ тиззаси йиртиққа кулди
Бир неча кун аввал Женеведа БМТнинг инсон ҳуқуқлари бўйича Кенгаши мажлиси бўлиб ўтди. Унда Туркманистон расмий делегацияси ҳисобот қилди. Энг қизиғи шундаки, делегацияга раҳбарлик қилган Туркманистон ташқи ишлар вазирининг биринчи ўринбосари Вепа Хожиев нутқ сўзлаб бўлгач, сўзни делегациянинг бошқа бир аъзосига бераётган маҳалда, микрофонни ўчиролмаган ва жахл билан ўз она тилида сўкиниб юборган, дея хабар берди Ўзбекистонда энг йирик тиражда чоп қилинадиган “Даракчи” нашри.

Албатта, ўз ўқувчилари учун маълумот сифатида бундай эксклюзив хабарни тарқатган нашрга тасанно, аммо таҳририят бундан аввалроқ, аниқроғи, 1999 йилги Кенгаш мажлисида бўлган воқеани шу баҳона эслаб ўтса яхши бўларди. Ўшанда Ўзбекистон ҳукуматининг ҳисоботини тақдим қилаётган делегациямиз вакили Алишер Шарофутдинов ҳам туркман мулозимининг “қовун”ини туширган, яъни ўзбекчасига бўралатиб сўкинганди. Кейинчалик порахўрлиги эвазига жавобгарликка тортилган Шарофутдиновнинг сўкиниши ўз вақтида шов-шув бўлган. Шуни айтсалар керак-да, иштони йўқ тиззаси йиртиққа кулибди, деб.

Дарвоқе, Вепа Хожиев "қовун тушириш" устаси эканлигини аввал ҳам кўрсатган экан. Масалан, у ўттган йилнинг март ойида Нью-Йоркда БМТ қўмитаси йиғилишида нутқ сўзлаётганда Туркманистонда "барча туркман жамоатчилик фаолларининг маълумотлари сақланган супер Ай-Пад борлигини" айтган.
« Олдинги хабар Хабарлар рўйхати Кейинги хабар »