14 April 2013
08:13 - Мавлуд ҳам сиёсий тадбирга айланмоқда
Кўпчилик тарафидан Пайғамбар Муҳаммад алайҳиссаломнинг туғилган куни деб тан олинган (ҳозирги календарь бўйича) 20 апрелни ҳам ўз ичига олган ҳафта (душанбадан якшанбагача) ислом ўлкаларида Мавлуд ҳафтаси сифатида нишонланади. Жорийдаги йилда бу ҳафта 15 апрелдан бошланади.

Туркия Диёнат Ишлар Вазирлигининг шу муносабат билан тайёрлаган программаси доирасида кеча Анқара Ёпиқ Спорт Залида катта йиғилиш ўтказилди. Бу ерга Бош вазир Ражаб Эрдўғон, мухолифат лидерлари Камол Қиличдорўғли (социал-демократик руҳдаги Жумҳурият Халқ Партиясининг раиси) ва Давлат Боғчали (Миллиётчи Ҳаракат Партиясининг раиси) билан бир қаторда чет эллик меҳмонлар ҳам таклиф қилинган. Йиғилишни Диёнат Ишлар вазири Меҳмет Гўрмез очди, кейин Қурону Карим ўқилди. Диёнат Ишлар Вазирлигининг Taсаввуф Хори концерт берди. Кейин Меҳмет Гўрмез, Камол Қиличдорўғли, Давлат Боғчали ва Ражаб Эрдўғон нутқ сўзладилар. Президент Абдуллоҳ Гул бу ерда йўқ эди. Унинг мактуби ўқиб эшиттирилди.

Туркия матбуоти сўнги ойларда совуқ уруш ичида бўлган ҳукумат ва мухолифат лидерлари бир-бирлари билан қўл бериб кўришганлари, Пайғамбарга ҳурмат кўрсатиш учун баравар ўринларидан турганлари каби нарсаларга катта эътибор бермоқда. Оёққа туришдан кейин бир ёш бола тарафидан ўқилган шеърдаги "Бирлик ва баробарликни доим қўлла, Оллоҳим" сўзларини ҳам лидерларнинг бир орага келишига боғлашга ҳаракат қилинган.

Расмда: сўлдан - Камол Қиличдорўғли, Меҳмет Гўрмез, Ражаб Эрдўғон, унинг хотини, ўнгдан биринчи - Давлат Боғчали.
« Олдинги хабар Хабарлар рўйхати Кейинги хабар »