08 April 2013
02:23 - Қозоғистон Президенти Нурсултон Назарбой расмий ташриф билан Хитойда
Нурсултон Назарбой 5 апрель куни кечқурун Пекинга келиб, China Daily газетасига интервью беришга ҳам улгурди, аммо расмий ташриф 6 апрелда бошланди. 6 апрель куни эрталаб ўтказилган расмий кутиб олиш маросимида Нурсултон Назарбой ва ХХР Раиси Си Цзиньпин билан фахрий қоровул олдидан ўтдилар, сўнга биринчи учрашувни бошладилар. Ўша куниёқ бир қатор икки томонлама ҳужжатлар имзоланди. Иккки раҳбар бир бирларини мақтаб, икки мамлакатнинг дўстлиги ҳақида баланд парвоз гаплар гапирдилар. Гапларнинг орасида Хитой компаниялари Қозоғистон нефтининг 25 фоизини қазиб олаётгани, икки мамлакат ўртасида 2012 йилдаги савдо айланмаси $23,9 млрд бўлгани, бу аввалги йилга нисабатан 12,5 фоиз кўп эканлиги ҳам тилга олинди. Си Цзиньпин шу йилнинг биринчи ярмида (?) жавоб ташрифи билан Қозоғистонга келиши ҳам айтилди.

Кеча, 7 апрелда Нурсултон Назарбой Боао Осиё Форумида иштирок этиб, нутқ сўзлаб, жаҳон координатлар системасида Евросиё марказий жой олишига ҳамма имкониятлар борлигини алоҳида таъкидлабди. Маълумки, Нурсултон Назарбой Остона шаҳрини Евросиёнинг марказига айлантириш ниятини ҳар доим гапириб келади. У кеча ҳам бу ниятини гапириб-гапирмаганлиги хабарларда айтилмаган.

Эслатиб ўтамиз, Боао Осиё Форуми Филиппин, Австралия ва Япония раҳбарларининг ташаббуси билан 1998 йилда тузилган ва унинг штаб марказий қароргоҳи Хитойнинг Хайнан вилоятидаги Боао шаҳарчасида жойлашган. Давос Иқтисодий Форумига ўхшаб кетадиган Боао Осиё Форумининг биринчи конференцияси 2001 йили Боаода 21 давлат вакилларининг иштирокида ўтказилган.

Ҳозир ўтказилаётган 12-чи конференцияда Қозоғистон, Мексика, Перу, Финляндия, Мьянма, Замбия президентлари, Брунея султони ва Австралия, Камбоджа ва Янги Зеландиянинг бош вазирлари иштирок этмоқда, дейилади қозоқларнинг хабарида. Нима учундир, бу рўйхатда Хитой тилга олинмаган.
« Олдинги хабар Хабарлар рўйхати Кейинги хабар »