07 August 2011
14:58 - Бу Эронда эмас, Туркияда бўлди: Оғиз очиш замонидан олдин сигарет чaккан аёл калтакланди
Воқеа Туркиянинг Эрзурум шаҳрида кеча кечга яқин, аммо оғиз очиш вақтидан олдин юз берди, дейилади бу мамлакатнинг энг катта Миллиёт газетасининг хабарида. Шу ердаги чет эллик бир ширкатда ишлайдиган маҳаллий қиз (унинг исми айтилмайди, газета сайтига қўйилган видеода унинг юзи бекитилган) сигаретини ёндириши билан икки киши унинг олдига келиб, сигарет чaкишни тўхтатишни талаб қилишган. Қиз “ рўза тутиш-тутмаслик менинг шахсий ишим” дейиши билан уни калтаклашга бошлашган.

Қиз яқиндаги бир ётоқхонага қочиб кириб, ўша ердан полицияга телефон қилибди. Дарҳол етиб келган полиция у икки кишини полицияхонага олиб борган ва протокол тузилгандан кейин қўйиб юборган.

Табиий, керакли тергов ишлари ўтказилиб, керакли қарор чиқарилса керак. Аммо, хабарнинг аслида ваҳимали, исломчилар учун эса, қувончли тарафи бор. Эрон каби давлатда бундай воқеанинг юз бериши оддий ҳол ҳисобланган бўларди. Аммо, 80 йилдан бери дунёвий давлат асослари яратилган Туркияда бундай бўлишининг сабаби битта – сўнгги ўн йилда Туркия исломий давлатга айланиш йўлидан кетмоқда. Яна бир неча йилдан кейин оғиз очиш вақтидан олдин овқат еган одамлар ёки ҳижобсиз юрган аёллар тошбўрон қилинмаса ҳам, калтак билан жазолинишга бошланса, ҳайрон бўлмаслик керак.
« Олдинги хабар Хабарлар рўйхати Кейинги хабар »