17 December 2010
03:08 - Қозоғистон ўз мустақиллигининг 19 йиллигини қутламоқда, табриклаганлар ичида Ўзбекистон президенти йўқ
1991 йилнинг август-декабрь ойларида мустақиллигини эълон қилган собиқ Совет жумҳуриятлари ичида фақатгина Украина мустақиллигини СССРдан ташқарида деб белгилаганди. СССРдан ташқарида мустақил эканликларини аввалроқ эълон қилган Гуржистон ва Болтиқбўйи жумҳуриятларини ҳисобга олмаганда, табиий.

Шу сабабли, ўзи аввалдан мустақил бўлиб, мустақил давлат сифатида бир вақтлар Совет Иттифоқига кирган давлатларнинг, жумладан, Ўзбекистоннинг Совет Иттифоқидан чиқишини айтмасдан мустақиллик эълон қилиши ножиддийлик бўлган. Бир вақтлар СССРни тузган Россия, Украина ва Белорусия 1991 йил 8 декабрда СССРни тарқатиб юборишгандан кейин, бошқалар қатори Ўзбекистон ҳам мустақил бўлиб қолган.

Ўз-ўзидан мустақил бўлиб қолган Қозоғистон Совет Иттифоқи тарқатиб юборилгандан кейин мустақиллигини эълон қилгани ҳам ножиддийлик бўлганди.

Нима бўлса ҳам, бугун Қозоғистон ўша “мустақиллик”нинг 19 йиллигини нишонламоқда. Қозоқ ахборот воситалари мамлакат президенти Нурсултон Назарбойга кўплаб давлат раҳбарларидан табриклар келганини айтишар экан, АҚШ президенти Барак Обама ва Франция президенти Никола Саркозининг табрикларини алоҳида урғулашмоқда. Лекин, табрик юборганлар ичида Ўзбекистон президенти Ислом Каримнинг номи тилга олинмаган. Ўзбекистон президентининг матбуот хизмати ҳам Қозоғистонга табрикнома юборилгани ҳақида ҳеч нарса айтмайди.

Яқинда Остонада бўлиб ўтган ЕХҲТ саммитига бормасдан, ўзича Нурсултон Назарбойга очиқча ҳурматсизлик кўрсатган, аслида, алам ичида у ерга бормаган Ислом Карим бугун бутун қозоқ халқига ҳам ҳурматсизлик кўрсатишга қарор қилган бўлса ажаб эмас.
« Олдинги хабар Хабарлар рўйхати Кейинги хабар »