09 November 2009
12:17 - Покистон бозоридаги теракт натижасида 12 киши ҳалок бўлди
Кеча якшанба куни Покистоннинг шимолий-ғарбидаги Пешовордан 16 км узоқликда жойлашган шаҳарчанинг бозорида ўзини портлатган террорист 12 кишини ўлдирди, 25 киши ярадор бўлди, дейилади Associated Press агентлигининг Пешовор расмийларига асосланиб тарқатган хабарида.. Ўлганлар ичида шаҳарнинг мэри Абдул Малик ҳам бор.

Абдул Малик аввал Толибонни қўллаб-қувватлаган, аммо кейинчалик саф ўзгартириб, ҳозирги ҳукумат томонга ўтган, ҳатто ислом жангариларига қарши курашадиган махсус отряд тузган экан. Умар исмли Толибон вакили бу портлашнинг нишони айнан Абдул Малик бўлганини эълон қилибди ва Толибонга қарши бўлганларнинг ҳаммасини шундай кун кутади, дебди.

Охирги кунларда Толибон террористларининг турли ҳужумларида 300 дан ортиқ одам ҳалок бўлди. Уларнинг ҳаммаси тинч юрган одамлар. Абдул Маликдан фарқли ўлароқ, уларнинг Толибон олдида “айблари” ҳам йўқ. Лекин, юзлаб айбсиз мусулмонларнинг ўлими ислом фанатикларини қизиқтирмайди. Балки, улар бегуноҳ одамларни, ўзларининг фикрларича, жаннатга жўнатаётганларидан хурсанддирлар, дейди мухбиримиз.
« Олдинги хабар Хабарлар рўйхати Кейинги хабар »