Тошкент вақти - 
29 October 2009
12:00 -
Европа Иттифоқидан кейин БМТ ҳам ”Бирлик”нинг йўлини танлади
АҚШнинг Кубага, дунё ҳамжамиятининг Саддам Ҳусейин раҳбарлигидаги Ироққа қарши киритган санкциялари фойдасиз бўлганини мисол сифатида кўрсатиб, диктаторларга қарши санкцияларни диктаторлик режимларини Ғарбга интеграция қилиш билан баробарликда олиб бориш самаралироқ эканлиги хусусида гапирган “Бирлик” Партияси Европа Иттифоқини Ўзбекистонга нисбатан айнан шундай сиёсат олиб боришга чақирди. Партиянинг 2006 йил 13 майда, яъни Андижон воқеаларининг бир йиллиги муносабати билан эълон қилган баёнотида шундай дейилади: “Каримов ҳукуматига босим ўтказишни Ўзбекистонни халқаро институтларга интерация қилиш жараёни билан биргаликда олиб бориш шарт”.
Партия лидерлари Абдураҳим Пўлат ва Пўлатжон Охун бу ҳақда ЕИнинг ташқи сиёсат ва хавфсизлик масалалари бўйича бош комиссари Хавьер Соланага ҳам мактуб йўллаганлар ва унинг идорасидан миннатдорчилик билдирувчи жавоб олганлар.
Чақириқлар жавобсиз қолмади. ЕИ Ўзбекистонга қарши киритилган фойдасиз санкцияларни бекор қилиб, Ўзбекистон билан алоқаларни қайтадан тиклашга бошлади. Айнан шундан кейин бир қатор сиёсий маҳбуслар Ўзбекистон қамоқхоналаридан озод қилинди. Мамлакатимизда сиёсий муҳит бир оз бўлса ҳам юмшади. Дарвоқе, санцияларнинг охиргиси шу кунларда тугатилди. Энди юзага келган вазиятдан фойдаланиб, Ўзбекистонда демократик жараёнларни тезлаштириш йўлида ҳаракат қилиш демократик мухолифатнинг вазифасидир.
Бугун БМТ Бош Ассамблеясининг АҚШга мурожаат қилиб, Кубага қарши 40-50 йил аввал киритилган, лекин фойдаси бўлмаган санкцияларни бекор қилишга чақирди. БМТнинг бу қадами ҳам “Бирлик” Партиясининг таклифлари йўналишида эканлигини кўрмаслик мумкин эмас.
Буларнинг ҳаммаси “Бирлик” Партиясининг замонавий чақириқларга жавоб бероладиган етук сиёсий ташкилот эканлигини яна бир марта кўрсатмоқда. Партия раиси Абдураҳим Пўлатнинг мухолифатни "Бирлик"да бирлаштириш таклифи қанчалик ўринли ва мантиқли бўлганини эса бу хабардаги воқеалар ҳам тасдиқламоқда.
