27 October 2009
23:26 - ЕИ Ўзбекистонга нисбатан қурол-яроғ эмбаргосини бекор қилди
Бугун Европа Иттифоқининг Ташқи ишлар вазирлари Кенгаши Андижон қатлиоми туфайли Ўзбекистонга нисбатан жорий қилинган санкциянинг иккинчи қисми - қурол-яроғ эмбаргосини бекор қилди. Бу ҳақда 21 октябрь куни Брюсселда ўтган ЕИ дипломатлар учрашувда қарор олингани ҳақида аввал хабар бергандик.

Мазкур тимсолий санкция Ўзбекистондаги вазиятни яхши томонга ўзгартира олмаслиги аввалбошдан маълум эди ва шундай бўлди ҳам. Айни пайтда унинг бекор қилинганидан ҳам сезиларли таъсир кутуш мушкул. Лекин сиёсий жиҳатдан мазкур қадам Иттифоқни Ўзбекистонга бир қадар яқинлаштиради ва бу жараён мамлакат ҳукуматига нисбатан таъсир механизмларини шакллантириш имкониятини яратади.

Мухолифатнинг асосий кучи бўлмиш “Бирлик” Партияси раҳбарлари бекорчи санкциялардан кўра Ўзбекистонни ҳар қандай йўллар билан Ғарбга интеграция қилиш фойдалироқ эканлигини айтиб келмоқдалар. Партия раиси Абдураҳим Пўлат ЕИ айнан "Бирлик”нинг таклифлари йўналишида иш олиб бораётганини таъкидлаши ҳам кўпчиликка маълум. ЕИнинг борлигидан фойдаланиб, Ўзбекистонда демократияни ривожлантириш эса ўзбек демократларининг иши ва вазифасидир.
« Олдинги хабар Хабарлар рўйхати Кейинги хабар »